PM Modi-i Anushka aser Virat na nem golab naro kaka agütsü

New Delhi, December 22 (Agencies): Tawa kibong tasen akümer cricket asayar, Virat Kohli aser Bollywood actress, Anushka Sharma na Finland nung honeymoon tatsüka amongba sülen Brihostibarnü Delhi nung aliba five-star hotel ka nung wedding reception ka ayonga agi, aser iba sentong nung adentsü atema tenati Ato Kilonser, Narendra Modi-a jaoka liasü.
Ato Kilonser Modi kanga mazüngi liaka pai iba sentong nung adenba den külemi tena nem semept kaka agütsü.
Social media nung iba indang video ka prokshidar, aser iba video nungji Ato Kilonseri Virat aser Anushka na nem golab naro kaka agütsüba densema lir.
Bodhbar aonung Anushka aser Virat nati Modi ajurua tena indang reception nung adentsü atema jaoka liasü.
Tena kiiyimba aonung tenati sangdong ka ajanga, December ita tatemlen tenati Worli, Mumbai nung aliba ki mesemtsü, ta sangdonga liasü.
Delhi nung tena reception ayonga akaba sülen maneni tenati December 26, 2017 nü Mumbai nung reception ka ayongzüktsü aser iba sentong nung medemertem, Bollywood nung külemi inyakertem aser cricket külemi asayar aika jaoktsü imlar.
Iba sülen tena South Africa-i aotsü, kong Virat Kohli-i taruba series atema renemshitsü.
Anushka o Kohli na New Year Eve (December 31) külemi amongba sülen, labo Mumbai-i meyipa arutsü aser Shah Rukh Khan den külemi Aanand L Rai indang film tangok tenzüktsü.
Indain cinema nung nüngtugu Anushka aser cricket asayar nüngtugu Kohli na taküm December 11 nü Italy nung kibong küma liasü.