PM Modiba-i ajungben sen note tasen melenba ama ABAM-i Ao Osang Tajung Ken kaket tasenba melenogo

– I. Meren Lemtur, Tzüdikong.

Tang koba ABAM-i Ao Osangtajung ken kaket tasen adoka melener, ibai shidakba agibo,  Arogotem ajak nung kenyongi tang tejenbaji melentoktsüsa ajak peria yanglurang ayoktsüba asü.Saka Modibai sen merijang ana note ishika yanglur aoksa-a manger mesangwa dang nüburtem timtemdaktsüba medem, tang ken kaket tasenba ya arogo shia copy noklang ka ana lemshir dang tekülem nung Aoertem makmakshishiba mapang ka lir. Iba den ken tasentem koba ajung majung ajak inoka adokogo, tejenba kaket nung ken No-ajak agi 422 tashi lir, iba serial No-ji memelenshi-i atongloka yanglu ka asü nunga tasenbaji kodang peria arudir aruaka kenbang terabo medema tena alitsüba asü. Saka ken Number kar meyoktepba adokba ajanga tang  arogo nung music director-tem aser choir mastertem sentep kidang ken atenba mapang tejenba nung ken number aser dang tasenba ken number anaprongla ashitsüsa akümer. Iba den külem menden nung mener kasa ken ka aten nung tejenba nung atenertemi “Pai atsütet ta adener” Tasenba purtemi “Pai anitet” ta atener, ano taruba küm ana asem lir melenshidangjibo “Pai müsetet” ta asüba ya-ang shidak ta melenshitsü südi. Ao Laishiba aser ken kaket ya Tsüngrem sentsüwangshitsü asoshi masü, saka Aoertem pei  temetetba shisangtsü toktepba ka kümdaktsür, aser ABAM-i Laishiba aser ken kaket ya shishilembaba mapa tajung ka amai kümdaktsür. Ken tasen mebendenlokyonga ano ken kaket tejenba nungang süng kodanga metendangba ken aika lir. Tir Yimyim Oct-17 aser 18, 2017 adok nung S.Medem Kichu-i shisemba ka nung, Impur nungi ketdangpur kar arua aibelena kar nungbosa alitsü, saka aji nisunger yimya dang ta ashi ta zülua angu, anungji nia iba adianu den sema ano asen Aoerbo küm ana shi lira no ABAM-i  shidakba ken kaket jianosa adoktsü südi. Aser asenok inyakyim ya dangsa ora, ken kaket tasen alitsü sen maliji sentepiang moli ta akümtsü mapang arutsü. Sen merijang ana note tasen teka nung amer dokan nung  kecha alia magitetba ama, tang Ao arogotem nung kenkaket tejenba amer sentepi aoertembo choir masteri  tejenba nung aser tasenba nung ta meshie tasenba nungi aten dang tejenba amerbo tangar ken aten dang angüma  lur kazütsüsa kümogo, aser ken karbo  tejenba nungbo mali, anungji ABAM-i teküratiba nung nung arogotem ajak peria yanglutsüla, Aji mesüra,  tang copy ishika lemshir tamangertem  tekülem nung ken kaket ajanga tai menadaktsüba dang nungibo ajak peria meyanglu tashi tasenba ya ken mamshie ali nungang ajungtsü ta aria bilemba kar lemsateper.

You must be logged in to post a comment Login