Political party tem ya tamangba yimsü teloktem masü: Rio

Kohima, Tsüklai 18 (TYO): Nagaland nung aliba political party ka danga tamangba yimsü nung amendaker tenteta mali saka party ajak ya nübortem aser state ajungtsü tangatetba nung tentetba lir, ta Nationalist Democratic Progressive Alliance (NDPP) atema Chief Ministerial candidate, Neiphiu Rio-i ashi.
NPF, NDPP, Congress mesüra BJP süang, party ka danga tamangba yimsü indang party masü, saka terenlok bener arutsü atema democratic tangatetba nung tentetba party tem dang lir, ta pai ashi.
15-Southern Angami-II Assembly Constituency nungi NDPP candidate, Zhale Neikha atema nüboyimtsüba sentong ka nung jembidang Rio-i iba osang metetdaktsü.
Taruba election nung tokteptsü atema NDPP-i BJP den tesentaktep yanglubaji Khristan tangatetbatem agientsü atema masü saka India Linük Temzüng nung Arrla 25 aser 28 nung tamangba yimsü temeten agüja aliba ama Naga nunger sobaliba, inyaksangshi aser temetentem kümzüka ayutsü atema lir, ta paisa metetdaktsü.
BJP den menden 40:20 lemsatepbaji regional party ka ama NDPP-i tambusang shilem aser BJP-i tanubosang shilem agitsü atema lir, ta paisa shisem.