Prince Charles-i Remembrance Sunday nung shilem agitsü

London, November 11 (Agencies): Remembrance Sunday nung Prince Charles-i Queen Elizabeth II indang naro yutsütsü aser iba ya inyakyim tasen ka asütsü.
Remembrance Sunday nung Britain nunger raradang asür nem tetushi agütsür aser iba anogomung nung arishi küm 91 tain Queen Elizabeth II-isa naro yuja aru.
Ajisüaka, takümbo arishi küm 69 tain Prince Charles-i tetsü indang mapa melenzüka inyaktsü aser iba ya ajanga pai chuba menden melenzüktsü atema shilem tuluba agiba sayur.
Britain nung chuba aser chubatsür rongnung mapang talangtiba inyaka aruba Queen Elizabeth II-i la menden metoktsütsü, kechiyong lai la taküm ali tashi nübor tenzüktsü ta nangzüka li.
Ajisüaka, Charles-i chuba menden melenzüktsü aser iba asoshi pai Queen Elizabeth II indang tongti mapatem toktsür tanga mapatem teimba inyaktsüsa akümer.
Remembrance Sunday ya British nunger atema kanga danng tongtipang anogomung ka lir. Queen Elizabeth II-i küm 65 tashi yimsü süa arudang iba anogomung nung trokben dang shilem magitet. Ibaji la mashishi alidang anaben aser la bendang linüktem semdangba mapang pezüben liasü.
London nung aliba Cenotaph memorial nung agitsüba sentong nung tesüleni jajayonga aluba aser mapang talangka nokdakba yimyatem dena lir.
Iba sentong ya Queen Elizabeth-i Foreign Office balcony ka nungi reprangtsü aser iba mapang lar kinungbo arishi küm 96 tain Prince Philip la den külemi alitsü.