Putu 21 buba ya India’er putu: PM Modi

San Jose (US), September 28 (Agencies): Hombar nü Ato kilonser Narendra Modi-i, putu 21 buba ya India’er putu, ta ashiba den külemi India tia ajungbena melenshibaji linük nütsüng crore 125-i mulungtetba, tashi aser tenangzükba ajanga lir, ta ashi.
Silicon Valley tiyongtsü, San Jose nung aliba SAP Centre nung America nung alir India nunger 18,500 adenshia alidak Ato kilonser Modi-i, “Joko mapang tatsüka, nisungtemi putu 21 buba ya India’er putu ta jembia arur,” ta ashi.
Paisa, pa akümli mapang ajakji linük tenzükba atema agütsür aser linük atema alitsü aser asütsü, ta ashi.
Modi-i, tesüiba ita 16 nung tangbo alimai India ji balaka repranger. Tangbo alimai India ji mangdang aser tejangraba tasen ka nung repranger, ta ashi.
“India-i takok angubaji linük nütsüng shilem 65 bo (million 800) arishi küm 35 ser tekübokpur asüba ajanga südi ta ni amanger,” ta paisa ashi.
“Iba linük ya tesülen atsüngzüka malitsü ta ni mulung lemteta ashir,” ta pai ashi.
“Yangibo (US) tanü ya September 27 nü aser India nungbo September 28 nü. September 28 ya Bhagat Singh asoba anogomung lir. Taküm tenla agüja asür nem ni akhüm agütsür,” ta Modi-i ashi.
“Nenok dak computer sempet aliba ajanga alimai India dak ranglokba melenshiogo. Nenok dak aliba sempet, temulungtetba aser tasen purapitetba ajanga alima melenshitsüsa akümer. Parnoki (alimai) India dak ranglokbaji memelenshira, parnokji putu 21buba den meputep,” ta Modi-isa ashi.