PV Sindhu Korea Open final-i iogo; Okuhara den asayatsü

Seoul, September 16 (Agencies): Tang tasayadak Korea Open Super Series nung Olympic silver-medallist PV Sindhu-i China tsür He Bingjiao semi-finals nung koka Japan tsür world champion Nozomi Okuhara den final nung asayatsü asoshi jangaogo.
Iba asaya masüdang tena tsüngda asayaa aruba nung Sindhu-i asemben aser Bingjiao-i ponguben koker liasü. Taküm küm Asia Badminton Championship nunga China tsürlai Sindhu kokogo.
Ajisüaka tanü asaya nung Sindhu-i 21-10, 17-21, 21-16 agi Bingjiao madak takok nguogo. Iba asaya ghonda ka ser minute trok asayaa liasü.
World No. 4 India tsürla yagi China Open Super Series Premier yaküm aser India Open Super Series o Syed Modi Grand Prix Gold na taküm, ta kokteta lir aser tang asaya ka dang akok nungbo Korea Open dena abentsü asoshi maongka ngutetogo.
Ajisüaka iba jenjang tongtettsü asoshi World Championship final nung la tsükdaktsüla Japan tsür Okuhara akoktsü nüngdaker.
Olympic bronze-medallist Japan tsürla yagi semifinal nung 21-17, 21-18 agi World No. 2 Akane Yamaguchi koka final tongtetogo.