Pyongyang-i Pacific Ocean nung H-bomb tendangtsü amokmerener

New York City, September 22 (Agencies): US tir Donald Trump-i North Korea linük ajunga samatsütsü amokmerenba sülen iba linük-i hydrogen bomb tendangtsü südi, ta ashir aser iba ya Trump-i amokmerenba atema telangzüba agütsüba lir.
North Korea-i Pacific Ocean nung hydrogen bomb tendangtsü, ta North Korea indang foreign minister Ri Yong-ho-i Hokulbarnü New York City nung osangbener den jembidang ashi.
Atomic bomb apokba ajanga meimchir reshikangshiba ya Japan kisüngi ajangshia lir aser iba Ri-i iba ama amokmeren o jembiba ya Japan-i khenyongi magizükteter, ta ashi.
Iba ama tensa ka nung China-i telok ajunga dang aremzükteptsü ajungshir.
Trump-i mezüngbuba UN nung Mongulbarnü jembidang, North Korea-i US aser par tembar linük tem amokmerenra North Korea ajunga samatsütsü, ta ashi aser iba linük lenir Kim Jong-un dang “rocket man on a suicide mission,” ta aja.
North Korea lenir-i aiben yimjak nung osang mesangdonger saka pai Trump ya linük ka nung temtiba lenir asütsü metemsü, ta ashi.
Trump ya ochimashir aser gangster ka lir aser lendong aketba mapa inyaktsü jangrar nisung, ta Kim-i ashi.
North Korea nung nütsüng million 26 lir aser US nungi kümzüka alitsü asoshi nuclear noknü tashi tait renema alitsü nüngdaker aser mitkartem tashi ulushitsüba ya linük indang sentong nung tongtipangba lir, ta ashi.
Pyongyang nükjidong ji US linük tongtettsüba ya lir, ta ashir aser tawa iba linük indang nuclear noknü sentong renlokba sayuogo aser September tetenzüklen rocket nung inoktettsüsa hydrogen bomb tilaba küma yanglur tendangogo.
Trump-i UN General Assembly nung jembiba ya tekolok meshidaker yimya ka lir aser alima ostü nung rara ayongba rongnung tamajungtiba lir, ta Kim-i ashi.
“Trump-i jembiba ajanga ni tsübudaktsü mesüra anendaktsü masü saka ni jajaba lenmang ya shidak lir, ta ajangajanga agizükdaktsüogo aser iba lenmang sülen ni tatem tashi anidaktsü,” ta Kim Jong-un-i ashi.
Trump nem telangzüba agütsütsü asoshi ni kanga shisadanger aser pai imlaba dang tali telangzüba agütsütsü, ta North Korea lenir-isa ashi.
Kim-i iba ama sangdong ya kodanga pa tenüng nung magütsüdang.
“Trump-i alima matsüngdang ni aser ozü linük mezüngmeshi süogo, anungji onoki telangzüba tajung agütsütsü asoshi süoki ia temaba jenjang nung inyaktsü,” ta Kim-i ashi.
Technical tsütsü nungi US aser South Korea ya North Korea den rara nung lir, kechiaser 1950-53 nung Korean rara ya ‘peace treaty’ agi masü saka khen asoshi anena ataba dang lir.
South Korea nung US mitkar 28,500 lir aser North Korea amaktsü sentong yanglur, ta North Korea-i aitsür.
North Korea den shishilembaba bendanger company ajunga merenshitsü, ta Trump-i Brehostibarnü sangdong.
Saka UN framework tema tenokdangba agütsüba China-i magizüker, ta Chinese foreign ministry indang odongtar, Lu Kang-i ashi.

You must be logged in to post a comment Login