Quetta nung paramilitary police pezü taküm sama

Qetta, Tsüklai 14 (Agencies): Pakistan southwest tsütsü aliba Balochistan province kübok prangbong amertemi Rasemnü mita atar amakba mapang paramilitary police pezü taküm samatsü, ta ketdangsertemi ashi.
Pakistani Taliban temi iba lendong ya agütsü, ta shiogo aser iba ita nung mitkartem dak anabenbuba amaker. Quetta nung railway lenmang mita aoba mapang Frontier Constabulary ketdangsertem dak amak.
Asürtemi meyiba raratsü maongka mongutet aser iba tesem nungi Kalashnikov injang 108 ngutetogo, ta police ketdangser Abdul Razzaq Cheema-i ashi.
“Iba lendong agütsür ya parnok pezü alitsü südi aser parnok ya motorbike ana nung aru,” ta pai ashi. Paramilitary nung ketdangser katia iba lendong nung taküm samaba osang jangjashitsüogo.
Tsüklai 3 nunga suicide bomb pokdaktsür kati Swat Valley nung army camp ka amakdang sepai 11 taküm samatsü aser iba lendong ya Pakistani Taliban temi tenüng agia lir.
Iran aser Afghanistan den arrtsüa aliba Balochistan nung police aser mitkartemi küm ter dak tali Islamist telungpur aser separatist teloktem den rarayonga arur.
Pakistan nung province tulutiba pezü nung Balochistan ya ka lir, saka iba province nung nütsüng million tenet shi alirtemi gas aser ali rongsen parnok nem shidak melemzüktsür, ta mapang talangka nungi sorkar aija arur.