Raj Bhavan nung Naga Indigenous Games sayu

Dimapur, September 16 (TYO): September 16, 2017 nü Raj Bhavan, Kohima nung Youth Resources & Sports Department-i tang mezüng atema Naga Indigenous Games sayuba sentong ka ayongzüka agi.
Nagaland & Arunachal Pradesh Angh, PB Acharya aser kinungtsü nati saisapong balala ngua kanga pelaba metetdaktsü.
Iba ama indigenous games ya ajungkettsüla aser asen maitsü nung shilem tajung ka südaktsütsüla. Item saisapong ya oboula nunger mapang nungi tanü tashi asayaa arur aser iba nung asen sobaliba dena lir, ta tanü Angh-i ashi.
Sobaliba senmang tajung ya mesamadaktsütsüla aser asen maitsü ama benshitsüla. Saisapong aika exercise tajung lir aser item ajanga asen temang anema aser tiptema yutsütsü, ta Acharya-isa shisem.
“Asen oshi, asenoki süboba aser saisapongtem ajanga asen maitsü sayur aser asenoki item asoshi nüma atangtsüla aser ajungkettsüla” ta Angh-isa shisem.
Tanü Raj Bhavan nung sayuba saisapongtemji Naga Wrestling (Naga Kene), Spear Target Throw (Otsso Chenta), Strength Challenge (Peseum Petpu), Cane Sliding (Cheli/fula), Naga Go-Carting (Sei Bagei), Jumping Competition (Puxa-Kuxu), Touch & Catch (Pipeei-be), Stilt Bamboo Walk Race (Kara tsung/jangtok) aser Bamboo Sieve (Zharu-ruthou) nungertem liasü.
Youth Resources & Sports telokji YRS Director, Linda Solo-i lenisüba kübok department ketdangsertem liasü.