Rajinikanth politics nung denra nia adentsü: Kamal Haasan

Chennai, September 16 (Agencies): Actor aser film yanglur Kamal Haasan-i pa nija party ka tentettsü, ta osangbenertemi ashi.
Pai, superstar Rajinikanth politics nung aden nungbo nia pa den teka amteper aotsü, ta ashi.
“Rajini küna tsüngda mongin mapa kar atema o lemsatepogo. Pa yimsüsüba tsütsüi meyipra yimsüsübaren jembitsü tasak masütsü. Pa politics nung ajemokra nia pa den adentsü. Mapa nungbo küna kanga toktepogo, ajisüaka tongtibang tebilemtsütem lemsateper,” ta Hokolbarnü Tamil osangbenertem den jembiba mapang Haasan-i ashi.
Nü party tentettsü asoshi anogo tejangja shimteta lir ma? ta asüngdangdang pai, “Iba anogoji latettsü atema kecha arisangtsü mali,” ta langzü.
Ita ishika tejakdang nungi Haasan-i Tamil Nadu yimsüsübaren indang kecha marendaki jembia arur.
Haasan-i pa politics nung ajemoktsü indang terara jembisema arur.
Kechi party ka asütsü ta asüngdangdanga pai, BJP bosa masütsü, ta langzüa lir.

You must be logged in to post a comment Login