Rajnath lenisüba nung NE CM tem senden amentsü

New Delhi, July 06 (Agencies): Centre sorkari Northeast state tem nungi Chief Minister tem den onük balala nung o lemteptsü asoshi July 11 nü Guwahati nung senden ka ayongzükogo, item onük rongnung Myanmar nung amenoka aliba telungpurtem onük densema lir.
July 11 nü senden nung mendenbubaji Union Home Minister, Rajnath Singh asütsü aser iba senden nung NE tesem nung tensa reprangshiba den külemi Myanmar nung amenoka aliba NE telungpurtemi rara bulua adokdaktsüba anema inyaktsü asoshi lemteptsü, ta osang ajanga ashi.
Manipur nung telungpurtemi army 18 tepsetba sülen Indian Army temi kidanger linük nung NSCN-K aser tanga telungpur telok teseptem amakba sülen ita ka shi lir iba senden ayongzükogo.
Iba senden nung Assam, Arunachal Pradesh, Meghalaya, Nagaland, Manipur, Mizoram aser Tripura Chief minister temi shilem agitsü.
Iba senden nungsa Development of North Eastern Region Union Minister Jitendra Singh, Minister of State for Home Kiren Rijiju natia shilem agitsü.
Senden nungsa tang teyangludak lenmang, apu aser railway project tem indanga benoka jembitsü aser mapang atemzüka yur project ajak tembanga inyaktsü asoshi tongtibangsüa jembitsü imlar.

You must be logged in to post a comment Login