Rap ken atener Snoop Dogg-i gospel kensep saya

Tsüklai 02, 2018 (Agencies): Rap ken atener nüngtugu aser ken yanglur Snoop Dogg-i teti atenba ken yutsür mezüngbuba osangtajung kensep, “Snoop Dogg: Bible of Love” saya.
Iba kensep nung gospel aser R&B ken atener Tye Tribett, The Clark Sisters, Faith Evans aser Rance Allen nungertemi atenba ken densema lir.
“Ibai kü mulungjang nung teti liasü. Ni iba amala ken maten, kechiaser ni “gangsta” maparen mesür mapa ka mesüra tanga ka inyaka liasü. Ibai kü mulungjang nung mapang talangka nungi liasü amai bilemer. Ni tang inyaktsüla,” ta Beats 1 Radio den sensaksemba mapang Snoop Dogg-i ashi.
Iba kensep nung Snoop Dogg kisüng amsü, saka pa tetsüa densema shilem agir. Snoop Dogg tetsü Beverly Tate ya evangelist ka lir.
Snoop Dogg-i Instagram nung tetsü tena text sütepba screen shot sür post sütsü, kong pai tetsü dang, “osangtajung sangdongtsü asoshi küdang lenmang sayuba asoshi pelar,” ta shia lir.
“Na moatsüba asoshi aser Pa nüburtem temoatsü angutsü asoshi Tsüngremi na iba lenmang nung ania Gospel kensep nai yangluba atema Tsüngrem dang kanga pelar,” ta lai langzüa zülutsü.
Saka nisung aikabo Snoop indang gospel kensep ajanga balaka tejangraba mali.
“Iba tetetzü Snoop Dogg aser gospel na tayimtsü ka nung lir ta ashir na?” ta Twitter nung nisung kati ashi.
Snoop Dogg-i iba kensep tasenba ya Yangtepnü Bethel University nung concert aliba mapang saya.