RBI den State Level Security Committee (SLSC) senden amen

Dimapur, November 15 (TYO): Nagaland state atema RBI den 18 buba State Level Security Committee (SLSC) senden tanü menogo. Iba senden ya Home Commissioner, Nagaland, Abhishek Singh, IAS menden ser amen.
Senden nung Reserve Bank of India Mumbai, Security Advisor, K P Raghuvanshi IPS (Retd), Regional Director for North-Eastern States, RBI Guwahati, B K Mishra, police ketdangsertem, CRPF, BSNL aser Nagaland nung Bank ajak nungi teshimtet nübotem aden.
Senden nung bank kongsang ajak nung security & guarding, sen belenshidang amshiba currency chests aser security arrangements inyakyimtem meyipa reprangshi.
“RBI-i ashiba ama CRPF aser Nagaland Police-i currency chest anükba mapa inyaker aser sen belentepdang security maparen shitak dang inyaka arudar. Tang tashi nung bank kongsang kecha nung ozüng alema mapa inyakba mesüra ATM machine nungi sen auyaba osangtem maliba atema kanga pelar” ta Home Commissioner, Abhishek Singh-i ashi.
Fake Indian Currency Notes (FICN) apuba osang kecha mali aser demonetisation sülen Nagaland state nung Specified Bank Notes sen crore 3044 benden. Iba atema RBI-i Nagaland state dangi shidi sen tasen balala crore 4483 yok. Iba jagi Nagaland nung shidi agi anüngba maliasü, ta paisa metetdaktsü.
Senden nung RBI-i “Longleng nung Currency Chest lapoktsü atema SBI dangi Final Approval yokogo aser SBI-ia iba mapa inyaktsü mulunga lir” ta metetdaktsü.
Nagaland nung sen agi meperiba mali saka Nationalised aser Private bank ajaki cashless transaction aser e-payments inyakyim ajungmesotsüla ta Home Commissioner-i mepishia metetdaktsü.
Sorkar mapa inyakertem indang GPF withdrawls, Medical reimbursement aser TA/DA bills den sen tagütsütsü ajak bangdak government servant tem indang Bank accounts nung enoktsütsüla, ta Abhishek-isa ashi.
Paisa bank tem dang Hornbill Festival atema Kisama nung temporary ATMs amenoktsü atema tebilemba ka lemsatep.
Tanü amenba senden nungsa Special Secretary (Home) lenisüba kübok luden ka tentet aser iba luden jagi Nagaland state nung aliba bank kongsang 177 nung security nüngdaktem meyipa reprangshimtsü.
RBI Security Advisor, K.P Raghuvanshi,IPS (Retd)-ia bank ajak nung security maparen jungjunga inyaktsüla ta metetdaktsü.
Police ketdangsertemi Fake Indian Currency Notes (FICNs) putettsü atema RBI-i training agütsütsü mulunga lir aser ibaji sangküm January ita agitsü, ta paisa ashi.