RD Department Officers’ Conference 2017 agiogo

Secretary RD, Kelei Zeliang aser ketdangsertemi December 7, 2017 anogo RD Officers Conference nung kaket sayaba mapang tangokba noksa nung angur.
Secretary RD, Kelei Zeliang aser ketdangsertemi December 7, 2017 anogo RD Officers Conference nung kaket sayaba mapang tangokba noksa nung angur.

Kohima, December 07 (TYO): Conference Hall, RD Directorate, Kohima nung tanü Rural Development Department Officers’ Conference 2017 mungogo. Iba mungdang nüngtem nung “Detail List of VDBs (1980-18 to 2016-17)” aser “Detail List of VDB Fixed Deposit & VDB Welfare Fund” kaket tila ana saya.
Iba sentong nung jembidang, RD Secretary, Kelei Zeliang-i yimtsüng nung aliba nüburtem indang rongsenketsüng tongtibang süa ajungkettsütsüba indang jembi aser pei block nung PD aser BDO temi sentong tajunga yanglua inyaktsü ajungshi. Pai-sa ketdangsertem dang, yimtsüng ajunga semdanga yimtsüng nung alirtemi ashiba angadanger parnoki aginüba aser nüngdakba ama agütsütsüsa scheme balala inyaktsü ajungshi.
Naga nungeri tangar dak dang metaloker alitsü yimya süba lir, anungji nüburtem dang parnok indang sen renloktsü asoshi lenmang sayutsüla, ta Kelei Zeliang-isa ashi.
“Tangatetba melenshiang…meshitsüyaba yimya ya agütsüba yimya dangi melenang aser iba tsüngta nung mapa inyakba yimya alitsüla,” ta pai ashi.
January 2018 ita tetenzüklen Central Ministry nungi semdangtsü, anungji item asoshi renema alitsüla, ta BDO tem dang ashi aser ketdangser ajak pei tata tesem nung alitsü totuyuba agütsü.
Director, RD, Metsubo Jamir-i, BDO temi yim shia nung scheme aika masü saka ishika dang süaka tongtibang schemes benoker itemji junga inyaktsüla, ibaji ajanga parnok BDO inyakba mapang nung parnoki mapa tajung inyaka yutsübaji kodanga mamatoktsü, ta ashi. Pai-sa iba kaket nungi pei block nung mapa inyakba aser meinyakba VDB tem bushitettsü asoshi ketdangsertem dang ajungshia liasü.
Jamir-isa Secretary aser sorkar dang state nung block tem khen reprangshitsü ajungshi aser block 74 aliba ya state dak alia lir, ta ashi. Nisung kari mapa tali adokdaktsütsü mechi item block 74 ya yanglu, anungji item block ya 40 nungi 50 tsüngtai ajemdaktsür yimtsüngtem nem mapa inyakdaktsütsüla aser iba ajanga RD Department indang maparen shidak inyak tenzüker asütsü, ta Director-isa shisem.
RD Directorate nung RD director-isa Nagaland Rural Development Service Association (NRDSA) office chamber aser Multi-Utility Hall lapoktsü.
Iba sentong nung Account Officer, Engineer, BDO aser PD tem tenüng nungia o jembia liasü.
Iba sentong ya Joint Director (MGNREGA), Asangla T. Aier-i ketdang süa ani aser Joint Director (PMAY-G/PLN), Imnukshila-i tepela o jembi.
Iba sentong metenzükdang BDO, Engineer aser Account Officer tem den senden balala mena liasü.

You must be logged in to post a comment Login