Rekha-i la indang MPLAD Funds nungi sen crore 2.5 agütsü

Lucknow, November 2 (Agencies): Bollywood actress tejen aser Rajya Sabha züngsem Rekha-i la indang MPLAD funds nungi Rae Bareli atema sen crore 2.5 agütsüogo, ta ketdangser kati ashi. Rae Bareli ya Congress tir Sonia Gandhi indang parliamentary constituency lir.
Iba fund ya lenmang aser tzü supply yanglutsüba aser electricity supply tajungba agütsütsü asoshi transformers tasen amenokba nung amshitsü.
Ketdangsertemi ashiba agi, parnok atema Rekha Ganeshan fund nungi sen crore 1.42 sanction asüba nungi sen crore 1.6 bo agizükogo aser tanungba ya project inyakba tem küli kaket sayuba sülen angutsü.
Congress tir den tesendaktep tajung aliba osang ka ajanga ashiba agi, Rajya Sabha MP kati fund ya pa/la-i molungba constituency ka nem agütsütsübaji kodanga matalokba maparen ka masü. Kasa osang ajanga ashiba agi, Rekha-i tsüngdong oa Sonia Gandhi den ajurutep aser Rae Bareli nung la indang MPLAD fund indoktsü asoshi tejangraba aliba lemsatep.
Tang tashi nung iba fund amshia solar lights amenokogo, interlocking yangluba aser Cement Concrete lenmang yangluogo.
Rekha ya Upper House nung April 2012 nung Congress-i aniba United Progressive Alliance (UPA) II sorkari shimok. La Raja Sabha züngsem ka ama April 26, 2018 tashi inyaktsü.