RK Studios nung mi lendong atalok

Mumbai, September 16 (Agencies) : Dance reality TV sentong “Super Dancer Season 2” agiba nüngtugu studio, R.K. Films & Studios, Chembur nung Honibar nikongdang mi lendong tuluka atalokogo.
Iba lendong tesemi mi insepba gari 11 den ambulance tem arua mi tesashiji inseptsü inyaktep. Iba mi yagi video tangokba tongti takdang ka anüka rongdok, ta Brihanmumbai Municipal Corporation (BMC) Disaster Control ketdangsertemi ashi.
Iba osang zülu tashi nung mi agi yiruba osangbo kecha maliasü. Iba lendong ya electrical wiring ajanga adok ta temulung melemi bilemer.
“Mi ya kodaser adok iba osang tejangjajibo ano memetet aser mongutet,” ta iba lendong jangja alir nisung kati osangbenertem dang ashi.
Iba nisung jagi ashiba agi, “Sony Entertainment Television sentong tangokba tesem rongdokba mi agi shinga meyirubaji kangasa tia taka….. tesüiba hopta onok iba tesem nung shooting mapa inyaka liasü aser iba sülen September 29 mesüra 30, 2017 anogo nung ano tangoktsü liasü.”
Iba sentong tanabuba session nungji actress Shilpa Shetty, tetemjen choreographer, Geeta Kapur aser film yanglur, Anurag Basu nunger tetendangertemi asütsü. Iba sentong ya September 30, 2017 nü TV nung yoktsü aser iba indang advertisement bo joko sayu tenzükogo, ta kasa osang janga ashi.
Paisa ashiba agi, audition episodes bo joko tangokzükogo.
“Mi lendong jagi sentong ji memunudaktsütsü, aser iba sayutsü anogoji memelenshitsü,” ta kasa osang ajanga metetdaktsü.