RN Ravi-i tanga NSCN teloktem den ajuruteptsü akok

New Delhi, August 09 (Agencies): Naga yimjung olemtep nung Centre atema tiyongtsü nung jembitsür RN Ravi-i kobi melii Nagaland semdangtsü aser NSCN (Khole-Kitovi) dena NSCN telok ajak nungi lennirtem den ajuruteptsü, ta osang ka ajanga metetdaktsü.
“Kobi melii RN Ravi Nagaland-i aotsü. Pai NSCN telok tangatem nungi lennirtem den ajuruteptsü. Iba ya sorkari tanga teloktem dang yimjung maparen nung shilem agiang ta ajungshitsü atema lir,” ta osang ajangasa ashi.
August 3, 2015 nü Centre sorkar aser National Socialist Council of Nagaland (Isak-Muivah) tsüngda yimjung tenangzükba agiba nung NSCN telok ajak anioktsü atema inyakyim dena lir, ta osang ajangsa metetdaktsü.
Deobarnü Nagaland chief minister, TR Zeliang-i osangbener den sensaksemdang ashiba agi, Naga Hoho aser Eastern Nagaland Peoples’ Organization (ENPO) nungi züngsem 16-i Myanmar semdanga NSCN (Khaplang) tanishir SS Khaplang den ajurutepa olemteptsü asoshi security clearance nguogo.
Taküm March ita NSCN(K)-i India sorkar den küm 15 ceasefire nung aruba agien aser iba sülen parnoki Nagaland o Manipur nung Indian Army anaben amak.