Rock Reign-i Nepal atema ‘concert’ ayongzüker

Mokokchung, July 14 (TYO): Nepal nung menoknok lendong tulu adoka nübur meyi aika asüba den kiojen jenti samaba nüngtem parnok dang aria bilem temaitsü sayua teyari agütsütsü asoshi Mokokchung nung aliba ‘Rock Reign’ teloki kenten sentong ka August 22, 2015 aonung 6:00 ako nungi tenzüka yangi Cosmos Hall nung ayongzüktsü sentong renemdaki.

Iba aonungji ‘Rock Reign’ nung shilem agia arur band teshimtet kar den ano kentener tejen pur, tanü asüng atur kentener aser tejaoker kentener kija/teloktemi sabang agitsü sentong yangludaki ta Rock Reign ketdangsertemi yangi Cosmos Hall nung osangbenertem senden ka nung jembidang lemsatep. Iba den ano Gorkha Community nungia kentener telok kari shilem agitsü ta osang ajanga angazüker.

“Alima yimya lendong balala atalokba mapangbo alima nung alirtem ajak kin ka lir, anungji, kati ka yariteptsübaji koda tongtibang” ta Rock Reign ketdangser kati ashi. “Kolen lidir liaka Nepali nungerji asen adianu ama bilemer” ta paisa shisem.

“Koba Nepal nung lendong atalokogo iba asoshi aria bilemtsür, aji oda, aria bilemba temaitsü sayua peii akokba agi yariteptsü asoshi iba sentong ya ayongzüker, anungji, temulungertemi nungitdaktsüner” ta parnokisa ayongzüka ashi.

Mokokchung ya music jangraba lima ka lir, aji oda, lanurtem nem music tsütsü ajungshia sabang lapoktsüba den külemi ibai “teyari agütsüba concert” ka asütsü, iyongji “ibai concert balaka lir” ta parnokisa metetdaktsü.

Asenok ajaki metettsüba kaji, Rock Reign telok ya music meimer ishikati lungjemer 2011 nung tenzük. Mapang shia parnoki kenten menü sentong den lanurtem music meimertem ajungkettsü asoshi mapatong balala inyaka arur.

Taküma September ita nungi tenzüka Rock Reign 4th Edition alitsü aser taküm ‘grand finale’ sentongjibo Open Air ka nung akatsü sentong atongdaki ta parnokisa inyaka aotsüba maparen kar lemsatep.