Rohingya nunger den kibong makümtsü nenshir

Dhaka, Jan 12 (Agencies) : Myanmar nungi jena aruba Rohingya nungertem den Bangladesh senso shinga kibong mekümdaktsütsü atema sorkari koba ozüng züngzükja liasü, kasa ozüngji dang maneni amshitsü, ta tanü Bangladesh court kati nenshia metetdaktsüogo.
Ozüng latetja liaka Muslim nunger yimsü amshia taoba September ita nung Bangladesh nunger tebur kati Rohingya kin tsür (teenage) ka den kibong aküm. Kiyimsang tebu jagi iba ozüng anema ken o ka benoka liasü saka Dhaka yimti nung aliba High Court kati iba ken oji magizük.
Bangladesh nung jenoka aliba Rohingya nunger meyirijang aika nem senso temeten magütsütsü nükjidong nung 2014 küm parnok den kibalempu masütsü atema ozüngji latetja lir.
Rohingya nunger refugee den kibong kümra küm tenet tepuokdak ayutsü, ta latetja aliba ozüng anema arishi küm 26 tebursang tebu tenüng agi Babul Hossain-i ken o ka benoka liasü saka court-i ibaji magizük aser meyiper pa dangang sen 100,000 taka (USD 1,200) menokang ta tetuyuba agütsü.