Rohingya nunger ya linük security atema amokmeren ka lir: Centre

New Delhi, September 14 (Agencies): Brihostibarnü Centre sorkari affidavit ka ajanga Supreme Court (SC) dang, Rohingya nunger ya linük security atema amokmeren ka lir, ta metetdaktsü.
Sorkari Rohingya nunger meyipa yoktsü atema tebilemba lir. Myanmar nung parnoki reshikangshi tia ajuruba ajanga parnok India-i aru, aser sorkari parnokji ozüng alema arurtem lir, ta züngshir.
Rohingya refugees onük nung India dang ‘tamajunger’ ta ajaba atema yashi Union Minister, Kiren Rijiju-i aija liasü.
Rijiju-i, iba ya linük tenüng menüktsütsü atema lir, ta aitsü.
August 09, 2017 nü sorkari Parliament nung, UNHCR nung tenüng züluoka aliba Rohingya nunger 14,000 dak tema India nung lir, ta metetdakja liasü.
Ajisüaka tanga osang ka ajangabo, tang India nung Rohingya nunger 40,000 tashi ozüng alema India nung lidar, aser parnok timbaka Jammu, Hyderabad, Haryana, Uttar Pradesh, Delhi-NCR aser Rajasthan nung lir, ta metetdaktsü.
Brihostibarnü India-i Rohingya Muslim refugees atema teyari oset ton 53 Bangladesh linük dangi yokogo, aser maneni India-i teyari oset ton 7,000 yoktsü, ta osang angazüker.
UN-i ashiba agi, Bangladesh nung rara adokba sülen August 25 nü nungi tenzüka tang tashi nung Rohingya Muslim nunger 379,000-i Myanmar kübok Rakhine state toktsür Bangladesh-i jena aruogo.

You must be logged in to post a comment Login