Rohingya nungertem Myanmar-i meyipa moner

Dhaka, Jan 19 (Agencies) : Bangladesh nung Rohingya nunger refugeetem Myanmar limai tanaben meyipa yoktsü atema inyaktepa liaka ibaji anema parnok noklang aika adenshia longkak aitogo.
Myanmar nung parnok aliba state Rakhine jagi meyipa maodangsa parnok nem senso jenjang agütsütasü aser parnok taküm kümzüka ayutsü atema nangzüktsüla ta ozülu balala amer refugeetemji longkak ait.
UN special rapporteur, Yanghee Lee-i Bangladesh anüolentip tsütsü lapoka aliba camp semdangtsü lia Rohingya nungertemji longkak ait; tang iba camp nungji Muslim nunger million ka shi anenzüka lir.
2016 October ita sülen aruba refugee 750,000 shiji taruba küm ana tsüngda meyipa yoktsü asoshi Bangladesh sorkari Myanmar den tezüngzüktepba ka agiogo; taruba hopta nungibo parnokji apusoa yokba bilemdagi ta angazüker.
Aji oda süaka, tashiyim maparen nungi jena aruba sülen parnok tanaben Rakhine jagi meyipa moner, ta camp nung aliba Rohingya nungertemi tekong meranga nokdaker.
Tang linük ana tsüngda koba tezüngzüktepba agia lir, iba nungji 2016 October matongdang nungi Bangladesh nung aruagi alirtembo mezüngoker.