Rohingya Refugees onük nung India-i Bangladesh yaritsü: MEA Sushma Swaraj

New Delhi/Cox’s Bazar, September 16 (Agencies): Myanmar nungi Bangladesh-i jena arur Rohingya Muslim nunger refugees atema tejenokdak ki tasen 14,000 yanglutsütsü, ta tanü official osang ka ajanga metetdaktsü.
Bangladesh nungi osang ka ajanga ashiba agi, Brihostibarnü India Minister of External Affairs, Sushma Swaraj-i phone ajanga Bangladesh Ato kilonser, Sheikh Hasina dang Rohingya onük nung India-i Bangladesh yaritsü, ta shiogo.
Sheikh Hasina indang deputy press secretary, Nazrul Islam-i ashiba agi, Swaraj-i “Rohingya onük nung New Delhi tangatetbaji Dhaka den kasa lir,” ta shiogo.
Tamalena Bangladesh-i India dang item refugees tebilemtsü lemsatepa liasü.
Swaraj-isa, Rohingya tebilemtsü onük ya Bangladesh atema dang masü saka alima tebilemtsü ka lir, ta shiogo, ta Bangladesh osangkaket, The Daily Star ajanga metetdaktsü.
India sorkari Myanmar linük dang Rohingya Muslim nunger reshikangshi masütsü ajungshiba den külemi Bangladesh nung jenoka aliba Rohingya nungerji meyipa arudaktsütsü ajungshir.
UN osang ajanga ashiba agi, Rohingya nunger telungpurtemi amakba nung ajemdaker Myanmar mitkartemi nübur anema inyakba mapang nungi tenzüka (August 25) tang tashi nung Rohingya nunger 4,00,000 Bangladesh tonga aruogo.
Bangladesh ketdangsertemi ashiba agi, Myanmar arrtsü anasa aliba Cox’s Bazar district kübok Kutupalong nung Rohingya refugee camp lir, aser iba anasaji parnoki ali acre 2,000 nung tejenokdak ki yanglutsütsü.
Osangbener den jembidang Bangladesh disaster management secretary, Shah Kamal-i, “Sorkari Rohingya nunger 4,00,000 atema tejenokdak ki 14,000 yanglutsütsü lemtetogo,” ta metetdaktsü.
“Onok dang item kiji anogo 10 tsüngda yangluzüktsü tuyuogo. Ki shia nungji refugees kibong trok jenoktsü,” ta paisa metetdaktsü.
“Onoki UN agency balala nungia teyari agitsü,” ta paisa shisem.