Rubber Lu Ayimba

–  Dr. M. Temjen Longkumer, Lerie colony,  Kohima.

Nagaland nung Rubber Plantation indang kaket zülur
Tangar kin den külemi asen Aor aikati rubber lu ayimba angudang kanga pelaa bilemer. Saka rubber jenjang ajemba agi aika tezü danger aliba angur. Anungji, ni rubber nung mongin (expert) mesüaka ni shisadanga (research) agidang ajangshiba kar lemsatepner.
Temulong majemi maneni meranga inyaktsü kuli kar tatsü agi yamai agutsür. 2011 kum rubber jenjang kg. ka nung senpak 200 temai atu saka iba sülen kanga ajema senpak 100 kuboki alu. Ajisüaka, takum January 2017 nung RSS 4: Rs. 160/- kg. tashi akum. Aji oda jenjang tera tajungba kumogo. Rubber jenjang melenshibaji kuli (reason/factors) aika lir saka rubber tagidakji teti alitsü aser aji oda rubber shishilembaba (market) teti alitsü. Synthetic rubber koba kari totsü (petroleum product) yangluba nungi adoker, iba yagi natural rubber (süngdong nungi) bendanga memelentettsü.
India nung Kerala, south India nungi rubber teimba adoker saka sen aika indoka yanglur (high cost of production). Kodang Nagaland den medemdangdir dang tashibo Nagaland nung taa (labour charge) jenjang ajema lir (lower cost of production). Ano Rubber Board ajanga hapta ka nung khen dang rubber dong arangtsü (Weekly Once Tapping) saka akutsü (latex) kasa ayimtsü yimya tasen ka sayur. Iba ya ajanga sen ishiba indoktsü saka tarubabo kasa alitsü.
Rubber lu ayimer ajaki pei pei tashi yari (one’s capacity) dang ayim nungbo ajungtsü. Tatishitsü agi, nisung kati süngdong 500 ayu nung, pa kijai kenü nung süngdong 250 rangtettsü. Yamaji, tasüng nü (next day) 250 arangtsü. Ano pai kenü nung süngdong 20 telongtet meraka inyak nung ita ka nung süngdong 500 ji inyakmatsü (20 treesx25 days). Yamaji süra, nisung shinga nema taa (hajira) magütsüi rubber nungi yokzükba ajak pa meyong asütsü.
Rubber jenjang ajungtsü atema sorkar sentong (policy) dak tuluka keta lir. Anungji, rubber lu ayimer lokti tentet (Rubber Growers/Producers’ Society) tashi itta aser longjema alitsübaji kanga tongtibang. India sorkari aluyimer atema sentong (scheme) aika yanglua lir. Item teyari bushia agitsü merangtsüla. Saka sorkar teyari kija dak teimla yur inyakra “Ong mok etsüng dongzüng nung pela ama” asütsü. Tetezü, tatishitsü agi Rubber Board-i subsidy sen agutsür saka India sorkar (centre) nungi sen magütsü nungji aluyimer aika subsidy sen mangu aser tatem nungbo tezü danger rubber lu arem kümdaktsütsü. Anungji, peisasa mangdang tajung yur meranga züsentetta inyaktsübaji kanga tongtibang.
Asenok ya otsüla aser oboula nunger mapang nungi aluyima aruba kin ka lir. Anungji, tanü asüng yimya tasen (modern technology) amshia tsük lu dang masü saka rubber lu aser iba amala mesükba lu ayim nungbo rongsen lenmang nung kanga renloka aotsü südi ta bilemer.
[Temalen aguja aliba onüktem ya ‘Rubber Plantation in Nagaland’ kaket nung Engraji oshi agi tejangja zülua angutsü]