Sabang Ka Nung Benjung

Alima nung benjung tapu aika lir, aser benjung timbaka temoatsü, yimchiyimjung, takok, terenlok aser azükaru jenjang alangzüktetba nung ajemdaker amonger. Ajioda asen Naga lima nunga kin shia benjungmong balala pei kin sasep nung mongyonga arudar, ajisüaka Naga nunger arok benjungjibo ‘Hornbill Festival’ ya asütsü. Iba benjung ya küm shia Kisama nung December 1 nungi December 10 tashi mongyonga arur, ajidoda taküma Hornbill benjung amongtsü. Naga nunger nütsüng shilem 60 dak temabo aluyimbaren nung sendaka lir, ibayongji benjung timbaka aluyimba den sendaktepa amonger. Naga kin balala indang benjungtemji timbaka Tsüngrem dang temoatsü meshiba, Tsüngrem nem tenüngsang agütsüba mesüra yimchiyimjung den azükaru meshizüka kanga metsünga-reta amongba benjungtem lir, ibayongji sabang ka nung Naga kin balala tsüngda tesendaktep alitsü aser kin balala sobaliba ajungkettsütsü nükjidong nung Nagaland sorkari 2000 küm nungi tenzüka kümshia Hornbill benjung ya ayongzüka amonger. Iba dak alia Hornbill benjung ya India tesem balala nungi mesüra bendang linük balala nungi raliwalirtem atsüer arutsü, iba den külemi sen tarulen lenmang lia rongsenkettsüng jenjang ajungkettsü nükjidong nung ayonga amonger. Naga kin ajak adenshia benjung amongba ajanga alimaia Naga kin aser asenok sobaliba tali jangjar. State Tourism aser Art & Culture Departments-i ayongzükba Hornbill benjung nung sabang ka nung kin balala sobaliba sayar, iba den külemi kentenmenü aser tsüngsangba densema sentong balala ayonga agia arudar, aser ibaji ajanga asenok dang masü saka bendanger raliwalirtemia kin balala indang sobaliba angazükba den külemi Naga nunger achiajem, apensüoshi aser awashi densema yimya balala indang rajemer. Ajisüaka ano kodang tip külen nungi reprangdangdir, iba benjung amongba indang angashiba dangashi iba benjung nung dendangertembo shilem ishika dang asütsü. Ano India tesem balala nungi raliwalirtem aser bendang linük balala nungi raliwalirtem kar atemabo kümshia tesem ka nung dang iba benjung amongtsüji talaktsüka asütsü. Oda iba benjung ya state kübok district 11 prongla nung melentepa ayongzüka among nungbo ibaji ajanga arok benjung ya tali shisangtsü. Kisama ya Kohima nungi kilometer 11 shi pilar lir; yamaji district headquarters nungsa ayonga mamongyonga district kübok raliwalirtemi saputsüsa aliba tesem/yimtsüng nung district shia nung melentepa Hornbill benjung ayongzüka among nungbo Naga nunger aikati iba benjungji atangji nung ajangshitsü, aser Naga nunger sasep nunga tesem balala repranga senzütsü jangar atemabo ibajisa tajungba asutsü. Benjung indang tebilemba lemsateper asünung, asen Ao kin sasep nunga Moatsü aser Tsüngremmong ya küm shia yimtsüng, tzükong mesüra jila sasep nung dang masü saka küm asem-pezü nung khenbo asen lima nung sabang ka nung ayongzüker among nungbo ibaji ajanga asen maitsü taliba jangjatsü aser shisangtsü, iba den külemi lanurtemia item benjungmong retreta agitsü aser asen sobaliba tali asüngsashitsü südi.