Saina Nehwal tanaben World No. 1 akümer

New Delhi, August 20 (Agencies): Indonesia kübok Jakarta nung ayongba World Championships nung tamakok ajuruaka, India’er tetsür badminton asayar mongin, Saina Nehwal-i tetsür badminton asayar tarensen nung temaba jenjang ngua tanaben World No. 1 akümba osang ka Badminton World Federation (BWF)-i tanü Brehostibar nü sangdongogo.
Arishi küm 25 tain Saina-i temaleni jenjang ka atutsü maongka ngua Spain tsür Carolina Marin ajangteta tetsür World No. 1 tanaben akümtsü jenjangji angu.
Saina-i ajangtetba yong Carolina World No. 2 aküm aser Chinese Taipei tsür Tai Tzu Ying-ia Olmypic champion, China tsür Li Xuerui den temaba jenjang ngua tang World No. 3 kümogo.
“World No. 1 tanaben akümtsü maongka anguba atema kanga pelar. Ni iba jenjang tajung angutsüsa ni nungita yariba atema kü coach, Vimal Kumar aser kü tsürapur nunger dang pelaba metetdaktsür,” ta Saina-ia Twitter ajanga metetdaktsüogo.
Ano külen, World Championship bronze medal 2 tashi agizükla, P.V. Sindhu-i World Championships quarterfinal nung shilem agitsü jenjang nguaka, la tekübokleni jenjang ka lua tang World No. 14 nung lir.
Kidambi Srikanth-a tekübokleni jenjang ka lua tang tebur World No. 4 nung lir aser H.S. Prannoy merakzüi maneni World No. 12 nung aliba osang jangjaogo.
Ajisüaka, 2014 Commonwealth Games gold medallist, Parupalli Kashyap-bo tekübokleni jenjang 2 tashi lua tang World No. 8 kümogo.
Tetsür doubles asayar, Jwala Gutta aser Ashwini Ponnappa nata tang tetsür doubles tarensen nung World No. 10 jenjang ngua lir.
Tebur doubles shilem nung Manu Attri aser B. Sumeeth Reddy na tekübokleni jenjang 5 tashi lua tang World No. 22 nung aliba osang jangjaogo.
Mixed doubles tarensen nungbo India nunger asayar kati danga temaba jenjang 25 nung züngsemtsü maongka monguteti lir.