Samaro Ken

Ao lima nung yi aser mozümora agi lanurtem taküm raksaba mapang ka Servanthood Bible College, Dimapur nung azünger lanur asem ajurutepa putu tensa dak apet ken mejema adentsü tenzük. Parnoki parnoksasa iba telok dang Samaro ta jatet. Iba mapang machimajemtsü chiajemer timtem agütsür onsara nungji yimtsüng aser town-tem nung yimteni tashimangartem puoka ayutsü asoshi shiki yanglua azüoktsü merang. Ano, külen arogotemia lanurtem temulung meyipdaktsütsü asoshi asentenshi sentong tapu balala ayongzüka agi. Iba mapang aika temulung meyip saka ano aika peisasa pei taküm mazüokteti taküm raksa. Iba ama mapangji tzüim tulu nung rong tuluka raksar yangji alirtem ajak samatsüsa atalokba lendong mapang ka amato liasü. Idangji, Samaro kentener teloki atenba kentemji tekümzüktsü asoshi yokba rong mesüka liasü. Parnoki atenba kentem rongnung Merenba Taküm Melenshiogo aser Tepusang Samaro kentem nungi tenzüka Election ken mejema Aor tamangertemi küm pezü dang amangtetter ta atendang, item kentem jagi nisungtem mulungjang nung jembia temelenshi arutsü tenzük. Aji oda, Samaro teloki atenba ken ajanga taküm aser kibong melenshiba kuli aika lir. Tanü Samaro telok tentetter küm 25 ajungbamong Mokokchung Town, Kohima aser Dimapur nung agia arudangang ano asenok nem moatsüba Samaro telok ajanga nübortem temoatsü anguba tali jangjar. Asenoki junga mebilemdanger aser mereprangtetter dang ashi, ken dak tashi tuluka lir. Saul chuba temenen tanülai timtemdaktsüba mapang Davidi kongki atem nung Saul dak nungi temenen tanülatem pila aser pa mulung anisüngzüka akümba otsü 1 Samuel 16 nung shia angutsü. Iba kasaji asenokia Yisu tenüng tetshia ken aten nung mojing jenadoker, taneptsü angur aser mulung anisüngzüker. Kidang kibong nung kinunger ajak külemi adenshir ‘Kibuba Yisu nü mulung süang’ ta dang aten nung, iba kibong azükarutsü tenzüker. Aji oda, kibong nung kinunger külemi senteper ken kaket nung aliba ken ka dang külemi tener sarasadem mapang agi nung, iba kibong nung jagi tulur aser takar adoker. Tetezü ken ya Tsüngrem nungi arur aser ken ajanga Tsüngremi temenen aridoktsür aser asenok moatsür. Iba amaji ken ajanga asenoki samaa aliba tanülatem anir arur aser atsüngzüka oa alirtem tashi itshidaktsür. Tanü asenok nem Samaro ama telok ka moatsüba asoshi asenoki Tsüngrem tenüng asangtsü tim. Parnok telok tenteta ken aten tenzüker külen küm 25 tashi parnok ajak anema lia telongjem meraksai külemi ken tena arubaji parnok asoshia takok tuluka asütsü. Atangji, samaro telok asoshi küm 25 ajungbaji tatembang masü saka ano tashi itshir ken dang masü saka Tsüngrem o jembiba ajanga tanülatem anir aruba aser nübortem tanüla nung asentenshisaktsüba mapa tuluba inyaka aotsü mulungtettsüla. Alima nung sayutsüngir tulusang Billy Graham-i telok tulu nung sayutsüngia nübortem temoatsü ngudaktsübaji pai jembiba o kija masü saka pa den kentener teloki ken atenba ajanga nisungtem jepa temulung meyipba takok otsütem lir. Tanü asen lima nung Samaro telokia yamaji inyaktet. Parnok telok nung Tsüngremi amshiba sayutsüngir Limaba lir, ken mejemer tajung Watiba aser kententsü terok tajung aser Tsüngrem o jembitsü nunga tajung Sakuba lir. Par asem ya kija kija masü saka telok (Team) tajung ka kümer, tanüla nung kentena sayutsüngia senzü nungbo, parnokji Aor Billy Graham Team amai dang asütsü. Iba team jagibo tanüla tongpang tulu koktettsü. Yisu Khrista tenüng nung nisung dak nungi temenen tanüla aridoktsütsü asoshi tamang tulu nüngdaker aser aiben nisung ka kijaibo majeter. Iba amaji asen lima nung 1970s revival mapang atalokba ngua aruogo. Iba tamang aser teimla nung asenok ajaki Samaro telok asentenshidaktsütsü nüngdaker. Parnok tashi itshidaktsütsü asoshi sarasadem, shisatsü aser rongsen nüngdaker. Taoba küm 25 tsüngda Samaro ken ajanga temoatsü angurtem ajaki parnok asoshi maneni sarasademjangma.