Sanis SDO (Civil) Headquarters, ADC Hqs jenjangi ajungket

Sanis, Wokha, Aenjeti 18 (TYO): Wokha district kübok Sanis SDO (Civil) Headquarters, ADC Headquarters jenjangi ajungkettsüba ajanga district nüburtemi taginüba ataloktsüogo.
Tanep iba sentong nung jembidang Chief Minister, TR Zeliang-i, Sanis, ADC Hqs jenjangi ajungketba ajanga Sanis sub-division nung alirtemi terenlok aser azükaru putu ka ajurutsü, ta metetdaktsü.
Sanis sub-division ajanga Lotha Middle range aser Wokha kübok Pangti aser Lakhuti yim na den Doyang Hydro Electric Project ama tongtibang tesemtem ayimjemer. Iba sub-division nung EAC circles asem- Sungro, Aitepyong aser Lotsu lir; iba kübok ketdangsertemi yim 28 tashi ayimjema inyaka aruogo.
Tongti tesemdanger CM-isa, district HQ aser Bhandari ADC office tsüngda tesem tajung ka nung aliba, Sanis ajanga Wokha district terenlok nung tongtibang shilem ka agitsü, ta metetdaktsü.
“Iba tesem ya tongtibang transit point ka lir, kechiyong iba (Sanis) ya ajanga Assam nung Golaghat district den sendakteper. Shishilembatsü atema iba tesem nung maongka jenti lir aser lanurtem nema mapa maongka agütsütsü,” ta paisa metetdaktsü.
CM-i, “Sanis aser temeket tesemtem nung totzü aliba tesem aika lir, aser itemji rongsenkettsüng terenlok atema amshitettsü. Ajisüaka iba atemaji ali kiburtem teyari aser amalitep nüngdaktsü. Totzü aser natural gas exploration atema Nagaland sorkari ozüng aser temzüngtem latetogo,” ta metetdaktsü.
Nagaland state jenjang anguba mapang nung Sanis ya Public administrator ka kübok liasü aser 1960s mapang nung administrative HQ ji circle officer kati reprang. Iba sülen 1988 küm Sanis ya SDO (C)HQ jenjangi ajungketa liasü.
Tanü CM den Higher & Technical Education Advisor, Thomas Ngullie aser sorkar ketdangsertem dena liasü.