Sarasadem aser jakla

“Kodang Mosa Sinai tenem nung Tsüngrem den jembir alu, pa tejak tekepji sentsüpranga liasü”- Anitet 34:29.
Taküm indang aser Tsüngrem indang angatettsü asoshi sarasadem tenem nung tanela tenük atangji lapoktsür. Idakji ali shi indang bilemba jangjatsür aser Tsüngremi mapa inyaker ta asenoki angur. Shirnoki talangbai atur parnoki talangba, tesatemba angur. Shirnoki talangbai atur parnoki tejangjaba angur ta ashibaji shidak. Shirnoki sarasadem tenem talangbai atur parnoki tejangjaba aser talangba angur. Teküpboklen lenden nung mepet aser Tzüsü ateta alima mapa aser Kotaker mapa chichiba tesangwa nung jangjaa angur.
Atangji shirnoki maneni miim sarasadem alir parnok jakla melenshiba nung sayur. Sarasadem mesüi aliba mapang nung manguba tejak maneni sarasademba taküm tejak angutsü. Khristan kar tatsüzükba tashi nungi pilaa temaleni metura aser memelenshira ibai kecha agia masü saka pa/lai sarasadem tenemi matuba ajanga lir. Sarasadem tenemi matuba tetezü Tsüngrem den telongjem makaba. Tsüngrem den telongjem makaba ajanga temeshiba tebur tajungji mangur.
Mosa anogo lir nü Sinai tenem nung Tsüngrem den telongjem liasü aser pa tejak melenshir nübur dangi alu. Tasen Lai nung Stepen, sarasademba taküm, Tanela Temeshi agi asüngba nisung pa tsükchir, Yihuda nungeri pa tejak “kotak tenyar tejak” ama angu. Asen Kibubai sentsü melenba tenem nung sarasadem aser Pa sarasadem dang pa tejak melenshi.
Itemji sarasadem agi telunglen melenshiba tema nung sayuba lir. Ano Mosa indang bilemdangang- alima nung nisung ajak rongnung Mosa ajemalutiba liasü. Stepen-i ashiba shisadangang- “Kibuba iba temenen parnok dak tebenloktsü.”
Shirnoki miima Yisu den mapang tali agir, item taküm nung teti Yisu mesüka ainba, aser pa tebur tajung adokdaktsüba alitsü. Küm tasen iba sentsü melenba adokdakja aintsü maneni Kibuba Yisu den mapang agia jajatsü merangdi.

You must be logged in to post a comment Login