Saru mechi Cambodia sorkari osangkaket shibangtsü

Phnom Penh, September 03 (Agencies): Cambodia sorkari saru aika menoktsü tetuyuba agütsüba sülen iba linük nung aliba osangkaket, Cambodia Daily shibangtsüogo, ta sangdong ka ajanga metetdaktsü.
Iba osangkaket ya sorkar asoshi aiben obangtsükba ka lir aser iba osangkaket dang saru sen US sen million $6.3 menoktsü tuyu.
Cambodia nung opposition lenir, Kem Sokha ya tangar ashioktsüba aser sorkar anema mapa tamajung inyakba ken o nung Deobarnü apu.
Linük yirutsütsü asoshi tenüng maliba bendanger ka den külemi pai sentong yanglu, ta Sokha aija lir.
Cambodia Ato Kilonser, Hun Sen indang administration inyaksangshi nung tetsükdaktsü agütsüba yimden nung opposition aser lokti tentet balala nungi züngsemtem apuba rongnung Kem Sokha ya tang tesüsa apu.
Hum Sen ya taoba mapang Khmer Rouge commander liasü aser küm 30 dak tali tashi nung liasü aser pai taküm August ita nung Cambodia Daily osangzülur dang auer ta aja aser anogo 30 tsüngda saru ya memonokra osangkaket shibanger aotsüla, ta metetdakja liasü.
Deobarnü iba osangkaket shibangtsü indang jangjashitsüdang, “Saru menoktsü asoshi tax department aser osangkaket adoker tsüngda ozüng tsütsü mangatettep alitsü südi. Iba mangatettep ya audit agia telung nung angatettepa jembiba sülen ken o ya tembangtsü. Ajisüaka iba osangkaket dak tenük yoka saru tali meshi, osang taila temai adoktsü,” ta shia lir.
Iba osangkaket ya 1993 küm tenzük aser Hombarnü nungi madoktsü.
Linük nung yimjung raksatsüba media ajunga shibangtsütsü, ta Cambodia sorkar ajanga tamalena amokmerena liasü.
Cambodia Daily kisüng masü saka US sorkar indang senotsü teyari ajanga achaayangba Radio Free Asia aser Voice of America amala osang abenba teloki saru shidak magütsür, ta aija arua lir.
Item osang abenba telok ajanga sorkar tejak medentettsüsa yimden yimsüsüba nung ochimashi aser nüburtem temeden alema mapa tamajung inyakba indang osangtem mapang shia adoktsür.
Hopta ishika tsüngda Cambodia nung democratic yimsüsüba agi melenba asoshi süoki ia bilemer, ta US State Department ajanga ashi.
Ajisüaka Cambodia sorkari iba ken o ya yimden yimsüsüba nung sendaktepa mali aser linük nung osangbener temeden lir, ta ashir.