Saudi-i aibelener ka tekong tangja merenshiogo

Riyadh, August 10 (Agencies): Saudi Arabia-i aibelener ka tekong tangja merenshiba osang ka Saudi Interior Ministry-i tanü Hombar nü metetdaktsüogo.

Nisung tepsetba ken o nung aitsüba sülen Saudi sorkari Saleh al-Zahrani nem tasüba temerenshiji agütsü ta ministry-i ashi.

“Mangatettep ken o adoka raratepba sülen Saleh-i prangpong injang agi Attiya al-Zahrani kasetba kuli tejangja bushitetba sülen okadaki pa nisung tepsetba ken o nung aitsü,” ta ministry-i metetdaktsü.

Saudi nung aibelenertem nem tasüba temerenshi agütsütsüba ya taoba mapang nungi tang tesashiba akümba osang bushiteta lir.

Tan tesüsa Saleh Saudi southwest tsütsü Baha region nung tepseta merenshiba ya densema taküm 2015 küm tenzüker tanü tashi nung Saudi sorkari aibelener nisung 115 tashi nem tasüba temerenshi agüja tepsetba osang bushiteter lir.

Yaküm 2014 küma Saudi sorkari aibelenber nisung 87 tashi nem tasüba temerenshi agütsüba osang bushiteta lir.

“Alima ajunga nung Saudi Arabia linüki otsüsütsüsüa aibelenertem tepseta merenshir,” ta shia meimchir temeten asoshi nokdakba tongti telok, Amensty International (AI)-i Saudi sorkar aitsüba olen ka metetdaktsüogo.

“Tarutsü mapang nung aibelena inyaktsü bilemertemi aibena inyakba jakdang tanaben bilemdangdaktsütsü nükjidong nung aibelenertem nem tasüba temerenshi agütsür,” ta ministry-i par temerenshi agütsüba maparen metentsüba olen ka metetdaktsü.

Ajisüaka, “Saudi nung tentetba okadaki aibelenba nisungtem anema benokba ken o ochishia mangadangi parnok nem tasüba temerenshi agütsür ta shia,” AI-i Saudi sorkar aitsü.

Ozüng alema mozü mora shibelenshiba, tetsürtem tashiyim agi raksatsüba, nisung tepsetba, tongpang nung amshitsü prangpong bener rakzükraktemba aser pei tamangba yimsü sendokba ken o aibelenertem nem tasüba teremenshi agütsütsü asoshi Saudi-i benshiba Islamic ozüng nung lateta lir.

You must be logged in to post a comment Login