SC judges mangatettep bentettsü atema BCI-i telok ka tentetogo

New Delhi, Aenjeti (January) 13 (Agencies): Tang Supreme Court nung judge pezü- Justices Jasti Chelameswar, Ranjan Gogoi, Madan B Lokur aser Kurian Joseph o Chief Justice of India (CJI), Dipak Misra na tsüngda mangatettep onük adoka aliba atema tiyongtsüi ia jembia bentettsü atema tanü Bar Council of India (BCI)-i par züngsem teneti akümba telok ka tentetogo.
Hokolbarnü Supreme Court nung judge pezüi osangbenertem senden ka ayongzüka, linük democracy lendong tia ka nung lir, ta shia CJI aitsüba dak sendakba nung Bar council-i iba telok tentetogo.
Tanü osangbenertem den jembidang BCI chairman, Manan Kumar Mishra-i, “Onoki Council nungi nisung teneti akuma telok ka tentettsü atema telemtetba agiogo, iba telok jagi Supreme Court nung judge tem ajurua jembitsü. Onoki iba mangatettep onük ya tekaratiba nung bentetadokner,” ta metetdaktsü.
Judiciary telung onük nung yimtenren lenirtemi o balala jembiba aija BCI chairman-i, party balala nungi lenirtem dang iba onük nung tiyongi aita mejembitsü mepishia metetdaktsü.
“Bar Council of India tenüng nungi ni yimtenren party tem dang iba onük ajanga politics masayatsü mepishir. Onoki judiciary tenüng memenükdaktsüner. Nüburtemi judiciary nung tamang akar,” ta pai mepishia metetdaktsü.