SCA ajanga küm nung nisung 300,000 asür

New Delhi, July 11 (Agencies): Sudden Cardiac Arrest (SCA) ajanga küm nung nisung lakh asem tashi taküm samar aser item tasür rongnung tanur 7,000 tashi adener, ta Honibar nü temang anepaluyim nung mongintemi metetdaktsü.
Parnoki ashiba agi, SCA yagi minute ana shia nisung ka ka asür. Mama cancer, tepokpok cancer mesüra AIDS tashidak dang nungi SCA agi nisung timba asür.
“Temulungjang aoksa anenba ajak dang ‘cardiac arrest’ ta majar. ‘Cardiac arrest’ rongnung tebulubaji ‘Ventricular fibrillation’ ya lir,” ta Max Super Specialty hospital nung associate director aser cardiac electrophysiology lab o arrhythmia services nung tekolak Vanita Arora-i ashi.
SCA yagi temulungjang arakzüba anendaktsür aser iba jagi temang shilemi azü maoer. Anungji iba mapang electric amshia temulungjang arakzüdaktsür, ta Vanita-i ashi.
“Minute tsüngda nung yarira Cardiac arrest yagi takoksa magütsütsü. Cardiac arrest agi tonger külen minute süiba shia nisung ka takümji noklang nung shilem 7-10 tashi taküm lalutsü tebilemtsü adoker,” ta temulungjang yariba nung mongin Sumeet Sethi-i ashi.

You must be logged in to post a comment Login