SCERT-i NPSC dang miima tesayurtem shimer : ACAUT

Kohima, August 20 (TYO): SCERT department-i NPSC dang meshii lecturers / Assistant Professors mapa nung nisung 25 tashi 2007 küm nungi 2010 tashi nung ‘contract’ nung shimogo aser itemji May 22, 2015 anogo nung cabinet-i regularize sütsüogo ta tanü sangdong ka nung ACAUT teloki aija metetdaktsüogo.
Item ajakji yimten yimsüsür aser ketdangser tulurtemi mulungba nung tatidang magii shimtsü asoshi inyakba mapatem liasü ta parnokisa metetdaktsü.
Item lenmang meshitak nungi contract nung shimer külen regular sütsürtem rongnung Class 1 gazetted Lecture mapa nung nisung 13, 2007 küm shim aser May 22, 2015 nü regularize sütsü aser ano kasa anogo nungsa 2008 küm contract nung shimba lecturer 10, 2009 küm shimba lecturer ka, 2010 küm shimba lecture ka regular sütsü ta ACAUT telokisa metetdaktsü.
Iba ama meshitaki inyakba mapaji NPSC dang miima inyakba dang masü saka Lecturers/Asst.Professors 25 pronglaji “internal Suitability Test” agir dang regular sütsü. Iba jagi P & AR Department aser NPSC na pronglai item ama mapa nung shimbajibo temsü alir tejangrartem ajak toktepdakja shimtsü asoshi NPSC nem agütsütsüla ta asüba telemtetba anema inyakba jangjar ta parnokisa metetdaktsü.
Item Lecturers/Asst.Professors 25 pronglaji Cabinet ajanga telemtetba agir regular sütsüba ajanga tangar kasa mapang nung ad hoc nung shimertem aser 2012 küm NPSC ajanga tatidang agir shimertem jenjang majung kümdaktsüogo ta ACAUT telokisa metetdaktsü.
Ano, ACAUT telokisa SCERT nung PIO dang parnoki RTI ajanga metetnüa asüngdangba ama cabinet ajanga regularize sütsüba osang magütsüba atema mepelaba metetdaktsüogo