Scholarship sen dena chitsü na ?

Nagaland nung kaketshirtem nem scholarship magütsüba ajanga kaketshirtem longkak aitba ya tamamangtsü mapa ka lir. Government tenzükertem nem ita sen magütsütetba aser tanga terenlok mapatem tenüng nung sen agizüka chitsübatembo shitak asütsüa akok saka sensaker chirtem meyong India government-i yokba scholarship senbo Nagaland government-ibo mechitsüka asütsü ta bilemer. Atangji, Nagaland nungbo class ter ajanger temaba class nung azüngertem nem Post matric Scholorship sen agütsüba ya takar aser tulur chirnurtemi den meshia agir. Iba jagi kaketshirtem karbo scholarship manguyonga kecha balaka timtem majurui alitsü, kechiyong scholarship angubaji parnok asoshi ‘pocket money’ talila anguba amai dang lir. Ajisüaka, shitakbabo ibai sensaker chirnurtem yaritsü atema senotsü teyari agütsüba sentong ka lir. Aji oda, scholarship mapang shitak nung mangu nung karbo mazüng anentsüsa akümtsü. Tang Nagaland nung kaketshirtem aika iba timtem tia nungji lir. Atangji, jungjunga bilemdanga reprangdangra, tang Nagaland nung yimsüsür aser ketdangser tulurtem ajak ya sensaker kibongtem nungi intetba purtem dang lir. Parnokji tangbo takar aser tulurtem saka parnok teimbaka kanga timtema government-i agütsüba scholarship agi dang azüngba purtem lir.Iba kasa tia nungji tanüa Naga nunger kaketshirtem aika pei tsüraburtemi admission fee dena magütsütetba tia nung lir. Parnokji aika scholarship sen den parnoksasa ayanga azünger. Aji oda, tang kaketshirtemi parnok nem scholarship agüjang ta longkak aittsüsa akümba ya government nung alir yimsüsür aser ketdangsertemi scholarship-ji agia lira, ibajibo Tsüngrem meyong sen chitsü amato asütsü. Sensaker chirnurtem meyong chiyongtsü aser school fee rakzüka chitsübaji tajung tazü masü. Chitsür lira, ibajibo meimchir mulungjang adenertemi inyakbo masütsü. Kaketshirtemi scholarship manguba agi timtem marem ola adokba agi, government-i iba senji bushitsü atema Special Investigation Team (SIT) ka shimogo ta angazüker. Ibajiang tesüngmangtsü taketba, kechiyong Delhi nungi yokba kaketshirtem meyong scholarship bushitsübaji kecha talangkati bushiyonga aotsü mali. Mangu süra ano Delhi nungi meyoka anungji nenokia Delhi nung oagi asüngdangang ta shitettsüla aser arur nung chitsür lira chitsüogo saka bushia agütsüdi ta ashitsüla. Tanü asüngbo SIT tenteter bushiba dang nungibo kaketshirtemi state nung asüyonga mesüra center nung asüyonga RTI ajanga bushiba kanga agia tajungba asütsü. Government-i SIT nem bushidaktsüba tetezüji Delhi nungibo yoker ser nung kaketshirtem nem magütsüba kuli bushitsü asoshi tentet südi ta bilemer. Ajisüaka, tang tashibo center government-i Naga nunger sensaker kaketshirtem nem yokba scholarship-bo state governmment-i mechitsüka asütsü ta bilemer. Ochia mashiyonga sensaker tanurtem meyong amtsükbo koda-anga rakzüka machi ! Ochia mashiyonga shirangertem meyong tashidak reprangba machine aser mozü-bo koda-anga rakzüka machi ! Ochiamashiyonga tantsür tambur aser mekokmeiner meyong senotsü aser jangotsübo koda-ang rakzüka machi ! Iba amaji ochimashiyonga sensaker tanurtem meyong scholarship tashi nungbo koda-anga mekongshi ! Ochishia melitetyonga, aji alima nung meimchir yimya ka dang asütsü. Ajisüaka, sensaker kakshirtem meyong scholarship chitsür lira, ibajibo iba lima nung Nagaland nung dang ataloker asütsü. Kaketshirtem nembo state goverment-i dena scholarship agüja ajungshia züngdaktsütsü melen meyiper center government-i yokba dena techitsüang chitsüra, Naga nung sensaker chirnurtem asoshibo ibaji alima ka atemer asütsü. Ano, bendanglen azünger sensaker chirnurtem asoshi balaka scholarship mapang shitak nung mengura tuition fee aser mess fee magütsütet meyipa arutsüsa akümtsü. Ashiko, iba ama timtem jagi bendanglen nungi kaketshirtem meyipa aruba otsüa ataloker alitsüa akok. Iba ama tiaji pei taküm nung ataloker ama bilema, kechisüdir süaka, kaketshirtem asoshi inyakba mapabo ajak kanga aser kanga ochishia inyaktsüla.

You must be logged in to post a comment Login