Screen Timing ji kü atema tongtibang masü: Sonam Kapoor

January 19, 2018 (Agencies): Actress Sonam Kapoor, shiba Akshay Kumar den külemi Pad Man film nung tongti shilem agir, lai ashiba agi, movie ka nung shilem tila ka dang süaka tongtibang shilem ka agitsü asoshi lai mulunga lir. Koba Bhaag Milkha Bhaag film ajanga jangjatsür.
Sonam-i Neerja film nung shilem tajung agiba ajanga ajaki la tenüng asang aser National Awards tashi nung la tenüng züngoksemogo.
Sonam-i ashiba agi, “Screen timing ya kü atema tongtibang masü, saka otsü aser kü character na temeyoktepji tongtibangba lir. Character ka jangjadaktsütsü asoshi film nung shilem ajak nung adoktsü nüngdak madoker. Kü shilemji kanga junga yanglua lira scene asem nung dang adok yonga aji agi teperi.”
Sonam-isa ashiba agi, lai director tajung tem den inyaktsüba atema jangrar, kechiyong film yangluba ya ajak senteper yangluba art ka lir aser telok shidak den shilem agiba ajanga nisungshia dak aliba sempet aser shisatsü tali tajungba temai adoka sayuteter.
“Ni director R. Balki, Rajkumar Hirani, Ram Madhvani nunger amala den ano tanaben inyakner. Iba dak alaka ano ni Shoojit Sircar, Vishal Bhardwaj aser Shimit Amin nunger dena inyakner,” ta lai ashi.
Sonam-i tongti shilem agiba Pad Man film Aenjeti 25 nü sayatsüba lir aser iba sülen maneni Aami 1 nü “Veere Di Wedding” film sayatsüba atema renema lir.