SCTE nung B.Ed aser M.Ed programme tasen tenzükogo

Dimapur, July 8 (TYO) : July 8, 2015 nü State College of Teachers Education Kohima nung 2 year B.Ed and M.Ed programme lapokba sentong agiogo.
Iba sentong nung tongti tesemdangerji Additional Secretary Higher & Technical Education, Kenilo Apon liasü.
Kenilo-i o jembidang ashiba agi, UPSC, Medical Technical Entrance Exam amala nung asen nisungtemi takok tajung monguteter.
2013 nunga Nagaland nungi tetsür kati takok angu aser iba dak sendakba nung tesayurtemi ang shitak mesayur asü ta tasüngdangba arur. Anungji tesayurtemi pei inyaktsü lemzükba mapa shitak inyaktsüla kechiyong meinyakra kaketshirtem tarutsü raksatsütsü, ta Kenilo Apon-isa ashi.
Tesayurtemji asenok temang nung tongti tezü ama lir aser nenoki lanu putu anitettsü atema tebilemtsü khuret abentsüla, kechiyong parnoki tarutsü nung asen state lennirtem lir, ta Additional Secretary Higher & Technical Education-i teacher trainees tem ayongzük.
Tang Nagaland nung curriculum tasen tenzükba ajanga asneok tajangzük angutsü, ta Kenilo-isa ashi.
Sentong nung SCTE Kohima Principal-in-charge, Dr. Bendangyapangla-i ashiba agi, curriculum tasenji tan July ita nungi tenzüktsü.
Shisaliok bushibaren nung temelenshi aika adoker aser iba jagi curriculum tasen yanglushir. Iba curriculum ajanga tangazükba jenti alitsü aser SCTE toktsür aodang state kinük kisang ajaklen kaket shisatsü bushibaren nung temelenshi bener arutsü imlar, ta Principal-in-charge-isa shisem.
Kaketshirtem tenüng nung Toshienla aser Rose nati B.Ed aser M.Ed course nungi angazüktsü imlaba onük jembi.
Sentong nung mendenji Assistant Professor SCTE, Atula Longkumer liasü aser Assistant Professor, Thronlem Jorlim-i anküp tepela o jembi.