Sen atema masü saka tereprangertem atema ‘ABCD 2’ yanglu : Remo

Mumbai, July 13 (Agencies) : Choreographer-director Remo D’Souza-i direct asüba film ‘ABCD 2’ Rs.100 crore club nung züngsemba atema kanga pelar.

Ajisüaka, pai iba film ya sen atema masü saka tereprangertem atema yangluba lir ta metetdaktsüogo.

‘ABCD 2’ nung Varun Dhawan, Shraddha Kapoor aser Prabhudheva nungertemi tongti shilem agir aser taoba hopta Bollywood box office nung Rs.100 crore nung züngsem.

Tawa ‘ABCD 2’ sayaba film takok tulu anguba nüngtem nung Varun Dhawan aser Shraddha Kapoor nati takok anguba benjung ka ayongzüka mungogo. India tesem balala nungi iba film ajanga sen crore 100 tema aazükogo.

“Onoki iba film ya Rs.100 crore nung züngsemtsü atema nükjidong nung yangluba masü aser sir Remo-ia iba tebilembaji maliasü südi” ta Varun-i osangbenertem dang ashi.

Remo-ia ashiba agi, “Ni iba film ya sen atema yangluba masü. Kü temulungjang ajak bendanga agüja ni iba film ya tereprangertem atema yanglu aser parnoki sapua agizükogo. Iba jagi ni kanga pelar.”

‘ABCD 2’ ya 2013 nung ‘ABCD: Anybody Can Dance’ film den atongtepa yangluba film ka lir aser ‘ABCD 2’ takok anguba ajanga Remo D’Souza-i ano film tasembuba yanglutsü sentong yanglur.