Senmang, Senso aser Temeten

~ Talitemjen Imchen.

Ao Senden ajanga osang kaket nung 23rd July 2015 nü metetdaktsür ta ser Aor chanu den tzümarlongmar chanu tenüng aser kin benteta alitsü tetuyuba agütsüba nung aika ratamatatepba angashia, kü tangatetba ka lemsateper. Kodang kin kidong ta südir telok ana, tetsür telok ka aser tebur telok ka kümadoker. Aser aikati mangateti pei mulung taroktiba tashi lua yiruadoker. Saka tangatetba nung kodang shisadangdir lenmang ji balala aser bentetbenteta lir.
1. SENMANG (inheritance): – Senmang ya tapu ana (a) kin/kidong senmang aser (b) kibong/tsürabur senmang.
(a). KIN/KIDONG SENMANG: – Aortem anüdoklen nungi tesem balala nung lidangyonga arudang, telok anenzükdak tesemji pei meyong kümer liasü. Iba sülen telok tulu jagi telok tilala kümer tesem balalai senshi. Parnoki telok tilala kümer tesem balalai senshiba mapang, akok tashi kin abensaa kümer aotsü merang. Telok tilala tesem balalai senshir aliba dangji, kati ka den ayimtepa alir ta angateta YIM ta jatet. Yim balala kümteter, tenüki anguba alimatem tashiji yimer meyong aküm. Tenük agi anguba tashi mekazükba dangji LIKA ta aja. Lika jagi kin balala lemsar alu ayimtsü tenzüka lushi aser lumang jatet. Tanü Aor sobalibaji iba nungji APONGMEN (preamble) kümer lir. Lika nung sendakba süngti longti aser kimongji kin indangsa küma aor. Iba jagi kin/kidong senmang ta ajar aser aji yimeri meteta ayur.
(b) KIBONG SENMANG: – Rongsen/sentsü koba dang senmang ajar aser kibong sasep nung bendener. Kibong ka akümtsübaji kin aser anükapangeri meteta akümer. Kibong kati bendenba senmangji kibong nung tetsü o tebu nati alemer. Aser koba tashika awashiteta jalajabasotemi anir nüburtem alemer, kin aser anükapangeri meteta ayur.
2. SENSO (citizenship): – Yimya agi tebur kati talangi mouteter mesüra kiyii maor. Saka tetsür katibo kiyii aor aser talangia oa parnok den kiba kiyiteper. Tetsü kati tanur asem aso nung ka America, ka Africa aser ka Pakistan ta country balala nungia asotsü akoktsü. Saka parnokji Aor senso ta mejatettsü aser tanurji inteterbo pei pei tebu bushir küma oadoktsü menua maka. Iba jagi bendanger tanurtemji Aor tenüng aser kin tenüng magütsür. Saka Aotsür ka kodang bendanger kiyii odir, yimli ka atsüita yutsür. Aotsür kaji bendanger kinüngbo jagi tim mesüi benshirapang, Aor sobaliba nung kinüngboji merenshir mesüra takang achir. Ano laji alima nungi pilaadokrapang, kodaka talang pilar liaka, la tenüngji meyipa Aori abener. Iba den Aotsür bendanger kiyii aoba ajanga, Aor o bendanger temba tinu küma akangjungshitepba lir.
3. TEMETEN(rights): – 1963 Nagaland statehood anguba sülen temzüng nung aliba ama, tali tejangjaba nung tetsür tebur mebendangi temeden ajak kasa kümer arudagi. Tat. Kaketriju, sorkar mapa aser medennem (vote). Yangi kü tashi mait dang asütsü akok, ni tetsür dak ajitetba kar lir. Tetsüri libaliro nung peisasa atsüngzüka aoba aser tila kümadokba kar lemsateper.
(a) Teka mapa nung tetsür tebur inyakyim balala benteta mayutsüla. Mapa tera tasak ka mesüra khu tera taret ka angu nung, Aotsür mashi kati yabo nenok tebur mapa ta shitetbaji tesasatsü ka dang lir.
(b) Tetsürjibo tebur tapok atangtsüba dang ta jembiba ni lanuwa ozü yimtak angazük. Ni tain kümer alima balala nung senzüdang, watsübo ajaki jembir amai jembia angashir. Oren ya kangasa majung sernung züpazüpaa jembiba ka. Aser iba jembiba nung pei jenjang memeteti züdokba ka achiteter. Joko tetsüri jembitsübo doktsür tebur karidanga jembia angashira artsütsüla aser
(c) Late 90s nungibo Aotsür tanur asodang timbaka caesarean agitsüsa akümer. Doctor aser nurses jagi, parnok timtema kinü asotsü matanüba agi caesarean ji agitsür asü mesüra Aortsürtemji mapa meinyaki azümesena kümer tanurji mesoteterar tekaraba nung shisadanga melenshiteptsü nüngdaker. Pi kintsür tanur pezü pongu asoba mapang, Aotsürbo ka mesüra arianüa caesarean agia ana dang sotet nungbo, küm noklangjonga aodangbo, Ao lima ya netsüng mali samaa aotsü menua maka.
Naga lima nung unemployment indang jembir aser mapa mangur lanur aika lir. Saka salang (office) nungji züngdangra tzümar maliba departmentbo mali. Iba jagi asangsang nungbo unemployment problem ya maliasü ta aiben shisadanger. Tanga state under nung Naga nunger mapa angubabo malitsü. Saka asen lima nungbo küm shia sorkar küpok tzümalongmar mapa angubaji züngdang nungbo aika asütsü. Parnok Nagaland sorkar kübok mapa angubaji Naga kin kar tenüng nung angur süra Ao kin asoshia tebilemdangtsüji kanga lir. “Irek Telok Tepok Sünger Süngkonglaki Atudang Oyimbo Tepok Tazüng Liasü” ta jembi ama Ao kin mezüng tenük lapoker kin ta ser tangar anishidang aiben akoksar. Saka tarutsü Naga lima ajak atema ibai tajungba asünungbo tanü Aori nokdakbaji koda tongtipang. Temzüngbo tensa den apet yangluloka aor asünung, yaser Ao Sendeni tensa den apet kechi yangluloka odir Aor chanu asoshi jangratemtsüka asütsü.

You must be logged in to post a comment Login