SENSAKER DANG YARIBA TEPEN (T. KEN 41)

 

“Shibai sensaker dang aria bilemer pai Kibuba nem aputsür, aser pa mapa tajung asoshi pa nem Pai shia agütsütsü.” (A.Shin 19:17).

Tangar asoshi asen teka temoatsüba ka asütsü sarasadem ka – kotaker Oba, kü teka lapokjang!

Ne teka teti salaa lir. Pelaa agizükba aser moatsüba teka. Kodang Ne chir kangki nung Pa teka salar asü Nai ibai tabensa jungkai adoktsü.

“Mulungsoa agütsütsü kü teka salajang, Kibuba. Kü teka ajitrepatokra ni koda junga asazüka agütsütsü? (Luke 6:38). Kibuba Yisu O ni teti bilemtetta alitsü kü dang yariang, “Tagizükba dang nungi tagütsüba tali temoatsüba” (T.Mapa 20:35). Nai onok nem Ne chir aser Ne Tanela teti tatem makai agütsü. Nai onok nungi tajung kecha sotta mayur (Rom 8:32). Kü tekai agütsütsü tekara aser agizüktsü milungi südakjang. Kotak nung kü rongsen rizüngjang (Mt. 6:19-20).

“Kibuba, tashi maitertem yaritsü kü teka songlajang. Zükla alir yaritsü asoshi kü teka Hur aser Aaron teka ama lidakjang (Anitet 17:12). Ni kü teka melen tebilemba tagütsüdaktsü. Azüa aliba tzütok ni mesükdangtsü aser mokozü alungba mi meremseptsü (Mt. 12:20).

Timtem nung alir yaritsü kü teka salajang. Tanü alima nung ni Khrista temang züngsem ka ama Pai Pa taka salaba ama kü teka salajang. Sensakertem yaritsü asoshi kü teka kodanga ania tekümdaktsü kechiaser alima sensaker teti alitsü ta nai ashi (Tazüng. 15:10-11). Ni maneni asüngdanger aser Nai menungnangi agütsür (Yakob 1:5). Süra ni sensaker ken dang nungi tali meshir arutsütsü?

Temeim Oba, ni Ne nem magütsüdang kü tekai kwiben temenen mapa inyak! Ni tang aria bilemba mapa inyakdakjang. Ni kü teka Ne sabang nung yutsür, Na meteni ni kecha inyaktsü makok. Kü dang yariang ta ni Yisu tenüng nung sarasademer. Amen.