Shiba tilatiba, paji tulutiba

Ni nenok dang züngpong ashir; tetsütemi asoba rongnung Yohan Baptitsüba dang nungi tuluba shinga madoka; saka shiba kotak yimli nung tilatiba lir paji Yohan dang nungi tuluba lir. Mathi 11: 11.

Yohan Baptitsüba mapaji pa tilaba akümtsü aser Yisu tuluba kümdaktsütsu (Yohan 3:30). Yohani pa nütsüngtem dang pa toktsur Yisu sülen aotsu mela. Ita terok dang lir külen pa tepseta südaktsü. Saka Yisui kotak yimli nung Yohan Baptitsüba dang nungi tuluba shinga madoka ta ashi.
Mosai temerem tzüyim ana küma sadang, Elijai tasür shia arudaktsü aser kotak nungi mi jazük aser ainkartemi Tsüngrem osang aben saka Yohan mapang tatsüka dang süaka pa dang tuluba shinga madoka ta Yisui ashi.
Tsüngrem mapa tulu aika nai meinyaktsü akok, nai agütsüba tenlaji tera ka dang asütsu akok, ne dak tangar ama sempet malitsü akok, nai sayatenya mapa meinyaktsü akok saka nai ajemalua tilatiba kümer Yisuji dang ajungketa ngudaktsüra ibai teperi. Ne taküm, mapa, libaliro aser kechisarena nung Yisu ajungketang.
Sarasadem : Ni samadi, Na dang ngudaktsüdi. Amen.