Shisa tajung

Nagaland nung ochimashi mapatem nokdangtsü asoshi taoba hopta nung ACAUT teloki anir Kohima nung longkak aittsü tenzükba sentong magidaktsütsü asoshi Angami Public Organisation (APO) teloki nokdangtsü merangaka, ano Angami nungertem rongnungsa tebu tedi tangatettertemi Nagaland nung ochimashi mapa anema nokdakba mapatemji mesongtemtsüla ta yimjak nung ola adokba shisatsüji tenükshitsüka lir. Parnok amaji, ano kodangsa Nagaland nung ochimashi anema nübortemi nokdakdir, tanga Naga kintem nungia, senso tajungtem ajaki akok tashi parnok puji sema nokdaktsü ajungshir. Atangji, APO teloki Kohima nung longkak aitba sentong mekadaktsünüba kuliji benjong mapang asüba agi liasü. Aji oda, parnoki benjong mapang atongba mapangbo nisung ajak pei mapa atemtsü arishia aritepa jajar asünungji, longkak aitba ajanga timtem agütsütsü aser ano item mapatem jagi benjong mapang topur mejungi kümdaktsütsü südi ta arendaka bilem südi. Ajisüaka, asenok ajaki angatettsüba kaji, Nagaland nung ochimashi mapatem agi lanur aika mapa mangu timtemba aser kibong aika pei nüngdak mataloktet khuret agi nenneter aliba tebilemtsütem ajak nembanga yutsür benjong amongtsü renemteptsübaji tilar aser sensakertem anema taochi maka inyakba mapa ka asütsü. Atangji, longkak aitba sentong agi nübortem mapang tatsükabo timtem ajurutsüa akok mesüra alima topur mejungi akümtsüa akok saka longkak aitertemi dang timtem arema pei lima aser nübortem asoshi takümm ajak bendanga agüja nokdakdi süra benjongang memongi senso ajaki parnok den külemi nokdaktsü tim. Tang ama Nagaland nung ochimashi mapatem nem amoksepdaktsür, tetsübu aser tarendak agi ola adoker mali, yimten tashi alirtemi pei inyaknütsü inyakba mapang nung, nisung kari tasü itta ochimashi mapatem anentsüla ta ola adokba ya nisungtemi parnok alar tia nungi kümzüktsü asoshi Tsüngremi tekümzükertem yok ta angatettsüla. Nagaland nung tanü ama tia ka nung, kibong aika benjong amongtsübajibo yutsür, tanü chiyongtsü maka, tanurtem kaketrejui meyoktet, shiranger saka taneptsü bushii moutet, tazüngbo azüng saka mapa mengutet tebilemtsü agi asüngba kibong zünger mezüngma lir. Itemji nisung kari ochimashiba agi timtemdaktsüba kibongtem lir. Item ama kibongtem asoshi tanü Kohima nung ACAUT teloki anir ochimashi anema pei mapa aser kibong ajak toktsür taküm ajak bendanga agüja nokdakba amaji menokdakra, menua melii asen lima nung benjong mongnüyonga memongtettsüsa mapang ka ajurutsü. Nagaland nung tanü ama ochimashiba sen agi kibong ishika takar akümba nung kecha temulung anisüngzüktsü mali. Tanü ochimashiba mapatem ajanga ajemoktsüba aser timtemdaktsüba nübortemi timtem marem ola adokba ya mangashi aser mangu ama toktsüra, Nagaland nung lendongji yang nung jagi tenzüktsü. Mapa mekara ashi auyatsü, pei mang ayoktsü aser rakzükratemtsü. Idangjibo, ki tajung nung alirtema amui moutettsü aser gari tajung nung mener senzütsü arendaktsü. Nisung karbo jungjunga zünger mapa mangur saka karbo junga mazüngyonga angur, karbo bus nung senzütsüa bara maka saka karbo alia mangu gari tajungtiba nung mener senzür, nisung karbo asükba agi amui moutetter saka karbo onsara alemba agi mesaktetter, karbo anogo shi inyakba agi tebok masünger saka karbo meinyak ser anüng tonga mejungketa akar ta asüba lima ka nung kodaser yimjung alitsü ? Iba ama lima ka nung kodaser pelatepa benjong mongtettsü ? Aji oda, tanübo Nagaland asoshi benjong amongtsüba ya tongtibang masü saka ochimashi temenen mapatem anema raratsüba ya-ang tongtibang mapa ka kümogo. Aji oda, Angami nunger tebutedi tajungtemi ashiba ama, tanü asen lima  nung ochimashi mapatem agi nübortem timtem aser maksü ajurudang, lokti telongjem tentettemi nübortem tenüng nung ola adoktsüla aser ochimashi anema rarabaji külem tongpang asütsüla.