Shisadangtsü Mapang Ka

State Assembly election agitsü joko anogo 33 dang anünga lir, anungji taruba sorkar shimtsü atema tang mapang ya kanga shisadangtsü mapang ka lir, kechiyong taruba küm 5 atema aseni aginüba sorkar ka shimtsü asoshi asenok nem maneni maongka bener arutsür. Election mapang nung candidate temi pei constituency kübok tesem balala nung ‘declaration’ sentong ayongzüka pei tebilemba aser nükjidong lemsateper, ano party sasep nunga party balalai sorkar kümra parnoki inyaktsü atema tenangzükbatem aser tebilemba balala ‘party manifesto’ ajanga lemsateper. Ajisüaka Nagaland nungbo ‘manifesto’ ya kaket nung tezüluba ka dang mesüka kümogo, kechiyong koba party-i südir süaka manifesto nung nangzükba ama aika meinyaktsür. Yamaji party tasen kar tenteta nübur puatsüsa ‘manifesto’ nung aika nangzükaka nüburtemi manifesto nung joko tamang makatsü südi ta bilemer. Election manifesto nung tenangzükbatemji sensotemi melamela amadoker aser election nung takok anguba sülenbo sorkaria amadoker, iba jagi state merenloker. Nagaland state jenjang anguba sülen assembly election aika agia sorkar balalai yimsü süa aruogo. Yamaji sorkar balalai ‘manifesto’ nung nangzükba ama meinyakba ajanga tang Naga lima iba tia nung lir. 2014 küm India linük tesem ajaklen ‘My Space My unManifesto’ mapatong benoka liasü, aser iba kübok Naga nunger lanurtemia ‘Top ten Nagaland Youth Manifesto’ renema yimtenren party balala nem agütsü. Iba manifesto nungji Naga nunger lanurtem taginüba rongnung, Nagaland Assembly nung Lokayukta Bill agizükba den CBI branch ka amenoktsü, MLA aser Minister temi peipei constituency nung gari lenmang junga yanglutsü, sorkar mapa nung tejak mereprangi tajungertem dang shimtsü, teintet rogotem aser matamabensartem nem teyari agütsütsü; district shia nung youth hostel lapoktsütsü, district hospital shia nung ambulance pongungu agütsütsü aser law college, engineering college aser IT institutes amenoktsü densema liasü. Ibaji ajanga Naga nunger lanurtemi lenla ajak nung terenlok aginüba, gari lenmang tajung aginüba aser sorkar inyakyim ajak ochishia inyakdaktsünüba tanela sayur. India Union kübok state aika nung Hindu yimsü amanger yimtenren lenirtemi election manifesto nung nangzükba ama shidak inyakdang Khristan yimsü amanger yimtenren lenirtemi nangzükba ama meinyakba ya tesasatsüka! Centre nungi state terenlok atema sen aika yoker, ajisüaka tang asen lima nung gari lenmangtem, sorkar mozükitem aser sorkar school tem iba jenjang nung ang lir. Joko asen lima ojang rajang kümdaktsüdi. Tamalen ashi ama, joko election agitsü mapang ana nung lir, anungji tanü ajung masa-i taruba küm 5 atema bilema tan election nungbo ner constituency nung candidate ji komala nisung ka? Kechiba pai lenir kümner ? Pai constituency nüburtem meima inyaktsü asü ? ta shisadanga vote agütsüdi, kechiyong yimsüsürtem aser sorkarji peisasa shimer masü asenoki shimer.