Shisaliokji loktiliba den lenla süteptsüla: Angh

Kohima, August 20 (TYO): Tanü Nagaland Angh, PB Acharya-i, lanurtem nem shisaliok agütsübaji dang masü saka lokti-i nüngdakba peridaktsütsü asoshi shisaliokji loktiliba den liro medemtsüla, ta ashi.
Tanü nikongdang de Oriental Grand, Kohima nung Global Open University Nagaland kübok Department of Fashion Technology-i ‘Colors of North East’ omen nung ayongzükba 4buba Annual Fashion Show sentong nung jembidang Angh-i, TGOUN-i lanurtem nem tekalen mapa dak sentakba shisaliok agütsür, ta pelaba metetdaktsü.
Angh-i ashiba agi, University aika nung shisaliok anguba sülen lanurtem dak tekalen mapa sempet maliba ajanga tekalen mapa aser shishilembaba maparen nung matongoker, iba yongji lanurtem aikati office mapa dang bushir.
Fashion technology nung kaketshirtem ajungshia Angh-i, parnoki sobaliba takar ajangzüka alibaji ajungkettsütsüla aser wazüka ayutsüla, ta ayongzük.
Iba sentong nungsa Higher & Technical Education Parliamentary Secretary, Deo Nukhu aser Retired Commissioner, Nagaland TN Mannen nata densema liasü.
TGNOU Vice Chancellor, Dr H N Dutta-i lokti pela agizük aser sentong Coordinator Sentitola Ao-i tepela anküp o jembia liasü.

You must be logged in to post a comment Login