SIM-Adhaar sendaktepba atema sen magütsütsüla: NSF

Dimapur, September 19 (TYO): Naga Students’ Federation (NSF)-i state nung telecom service providers semdanga ogo, aser iba mapang nung, SIM card den Aadhar card sendaktepbaji angati inyaktsür ta jangjaogo, ta nüburtem dang sangdonger, ta tanü Chairman Public grievances Cell, NSF, Boketo Kiho-i sangdong ka ajanga metetdaktsü.
“Ajisüaka agency aser retailers kari iba atemaji sen agiba metetogo. Anungji nüburtem ajungtsü mechi nung Federation-i consumer tem dang iba service ji angati lir, anungji sen magütsütsüla ta metetdaktsür, iba den külemi agency mesüra retailer kari danga iba nungji aibelenra tapet temerenshi agütsütsü,” ta kasa sangdong nung shia lir.
“Iba dak alia, item ama ozüng alema benshiba metetra nüburtemi NSF office mesüra NSF federating Unit office mashie ka nem metetdakjang,” ta NSF-isa metetdaktsü.