Sinai Peninsula amakdang nisung aika tepset

Cairo, September 13 (Agencies): Bodhbarnü Egypt indang Sinai Peninsula nung khatepdang nisung 7 taküm samaogo, ta mitkar osang ka ajanga ashi.
Gaza strip den arrtsü anasa Egypt litsü nung Rafah jila nung checkpoint ka suicide bomber temi amaktsü merangba mapang mitkar ana aser tangar pongu tepset, ta Colonel Tamer el-Rifai-i ashi.
Iba lendong nung nisung ana yiru saka lendong agütsüba ya telok katia tenüng agia mali.
Iba tesem nung ISIL teloki amakdang police 18 tepseter anogo ana dang lir iba lendong ya adalok.
July ita Islamic State of Iraq & Levant (ISIL) temi Rafah tezülen aliba police outpost ka amakdang mitkar 23 taküm samatsüba sülen iba teloki sorkar meyong mitkar dak lendong agütsüba rongnung tang ya tesashiba lir.
Sinai nung Egypt ya küm aika rara arur saka 2013 küm mitkartemi Mohamed Morsi ya Egypt tir menden nungi atsüngdokba sülen azüdokshi taliba kümogo.
Sinai nung azüdokshi tali adokba tenüng amer Egypt sorkar-i linük ajunga nung taoba küm pezü tsüngta tashiyim amshia yimsü asür, ta osangbener kati ashi.
“Egypt sorkari Sinai nung azüdokshi tenzükdaktsü aser linük ajunga süngdaktsü saka talisa Sinai nung azüdokshi lir. Ibai ozüng ka lir – azüdokshi ajanga azüdokshi dang tali adokdaktsür,” ta pai ashi.
Sinai Peninsula ya Israel aser Gaza Strip den arrtsü lir.