Singapore-i North Korea den shishilembaba anener

Singapore, November 17 (Agencies): North Korea anema UN aser US-i tenokdangba tesashi agütsütsü merangba mapang ka nung Singapore-ia iba linük den shishilembaba ajunga anen, ta custom indang osang ka ajanga sayuogo.
November 8 nungi tenzüka shishilembaba osettem North Korea-i bener aoba mesüra North Korea nungi bener aruba ajunga nokdangogo, ta Singapore Customs ajanga ashi. Iba nung aibelenertem dang senchi achitsü mesüra tepuokdak küm ana tashi ayutsü.
Ibai North Korea-i nuclear trokbuba tendangba ajanga UN-i tenokdangba agütsüba sülen mapa küma inyak tenzükba lir.
2016 nung North Korea den shishilembar linük tulu rongnung Singapore ya jenjang tibuba nung liasü, saka iba ya North indang shishilembaba nung shilem 0.2 dang lir.
Pyongyang indang shishilembaba nung tembar tajungtiba ya China lir.
UN ajanga tang tesüsa tenokdangba agütsüba nung Singapore nungia ana lir.
January 2016 nunga Cuba nungi North Korea-i nok-o-nü bener aoba nung Chinpo Shipping Company ajanga UN-i tenokdangba agüja aliba temzüng nung aibelena teyari agütsü, ta court ka ajanga ngutetba sülen iba company dang senchi sen $125,700 achi.
Pyongyang-i Japan alema meta talangi aoba missile ana aser nuclear trokbuba aser tulutiba tendangba ajanga Korean peninsula nung tebilemtsü tali adok.
Singapore ya yimdenren nungbo Pyongyang den tesendaktep tajung lir aser Singapore nung North Korea indang embassy-a lir.