Singapore nung Halimah Yacob tir shimogo

Singapore, September 13 (Agencies): Singapore nung tir inyaktsü asoshi tetokteper shinga maliba ajanga election agiba mapang ‘walkover’ süa vote kata magütsüi tir menden nung mezüngbuba tetsür amentsü asoshi Halimah Yacob shimogo.
Halimah Yacob ya taoba mapang parliament nung speaker inyaka liasü aser la ya Muslim Malay tajemzükba kin nungi lir aser la den tokteptsüpur ya tetemsü kata mali, ta ketdangsertemi lemtetba sülen la den tokteper kata meliasü.
Arishi küm 63 tain Yacob ya iba tir menden nung amentsü asoshi Brehostibarnü tezüngzüktep agitsü südi, ta osang ajanga ashi.
China nungi jakzüka arurtem timba sür aliba Singapore yimti nung nütsüng million 5.5 lir aser nüburtem tesunep nung alitsü nükjidong nung ketdangsertemi iba tir menden atema tokteper ya Malay kin nungi dang shimtsü lemtet. Küm 47 nung Yacob ya Singapore nung mezüngbuba Malay kin nungi tir inyaktsü.
Tir menden atema tokteper ajunga ya private sector nung kibur asütsüla mesüra sen million $372 alitsüla, ta linük temzüng ajanga shia lir saka iba menden aoshi tokteper Salleh Marican aser Farid Khan nati iba jenjang metongtetba ajanga tokteptsü asoshi maongka magütsü.
Iba osang sangdongba sülen Yacob-i la saburtem dang pelaba ashi aser iba mapang ya Singapore asoshi nüma adangba mapang ka lir, ta ashi.
Iba city-state nung tir menden asoshi tokteptsü jangrar nem maongka magütsüba ya tang tasen masü, aser iba ajanga election ya nüngdak maliba ka ama kümogo.
Iba osang ya nisung aikati pela agizük saka aikati iba ama maparen ya democracy inyakyim nung maliba ka inyaker, ta ashir.
“Kin, oshi aser tamangba yimsü balala aliba ajunga aoshi ni tir ka lir. Election meliaka ni nenok tenzüktsü tejangraba mesamai lir,” ta election osang sangdongba sülen Yacob-i nüburtem den jembidang ashi.
Linük indang rongsen achayangtsü asoshi tir nem tashi agüja lir saka ato kelonser mesüra cabinet züngsem nem agüja aliba ama executive power tem bo Singapore tir nem agüja mail.