Sir Billy Connolly nem Knighthood agütsüogo

London, November 02 (Agencies): 75buba tasoba anogo amungtsü hopta ishika dang lia comedy mongin Billy Connolly nem knighthood agütsü.
Scotland nunger comedian Connolly nem iba knighthood tetushi ya Entertainment & Charity nem bendanga agüja mapa inyakba aoshi Buckingham Palace nung Duke of Cambridge-i agütsütsü, ta June ita nung 2017 Queen’s Birthday Honours list nung shia liasü. Saka pai iba sempet agizükdang teyi Florence alima nungi bilar aliba jashir.
“Ni tera tezü adanger saka kü molungjang taroktiba nungbo iba konang ngutetba asoshi pelar,” ta pai ashi. “Keyi Flo taoba küm süogo aser laia meimla, aser kü tsürabur ajak süogo, anungji parnok ajak yangi lir ta südaktsünür,” ta Connolly-i ashi.
Pa Knight of the Round Table mesüaka ‘The Last Samurai’, ‘The Hobbit: The Battle of the Five Armies’, ‘A Series of Unfortunate Events’, ‘Brave’ aser ‘What We Did on Our Holiday’ amala film tem nung shilem agia lir. 2012 küm BAFTAs nung pai Outstanding Achievement Award angu aser ano küm toku tejaklen pai BAFTA for Lifetime Achievement sempet ngua lir.
2003 küm Commander of the Order of the British Empire (CBE) shimer küm 15 lir pai iba knighthood ya angur. Pai ‘Billy Connolly’s Tracks Across America’, ‘Dying Laughing’ aser ‘Billy Connoly: High Horse Tour Live’ amala TV show tem nunga shilem agia lir.