Sorkar school nung azüngtsüla

Uttar Pradesh nung Govt primary school-tem jenjang kanga mejungi akuümba tia yanglushitsü asoshi yimten yimsüsür aser sorkar nung ketdangsertem chirnur ajak government primary school nung züngdaktsütsüla ta Allahabad High court nungi state sorkar nem ozüng agütsübaji UP state asoshi dang masü saka India rangben asoshi tayongzükba tuluka asütsü. Sorkar school  ya tangar asoshi lapokba, anungji ita sen ngura ojang  ozu chirnurtembo private school  nung dang züngdaktsütsü ta bilema mashimashi sayur amato, tanü UP nung dang masü saka Nagaland nunga sorkar primary school-tem nung tazünger mali kümogo. Asenoki  jungjunga bilemdanga meyipa reprangdangra, tanü Nagaland sorkar nung yimsüsür aser tulurtem ya teimbaka sorkar primary school nung züngtetbatem lir. Aji oda, Nagaland nung private school lapoka mao tashibo tulur tilar aser takar sensaker aser tesayurtem chirnurtem dena  government school nung dang zünga liasü. Aji oda, tesayurtemi  kaketreju nung tanurtem sayubaji Tsüngremi nungloktsüba khuret amato bilema kanga süoki ia inyak. Atangji, tamalen pur tesayurtem aika tashitemetet aser tazungba nung degree tajung mali asü saka parnok degreeji parnok ket nung tsüraburtemi yutsüba tanurtemji tajung kümdaktsütsü asoshi bendanga agüja sayutsu tangatetba liasü. Iba degreeji tanü Master degree den B.Ed degree anguba dang nungi tuluba aser tajungba liasü. Parnok jagi school kiji  pei ki dang nungi tajungba anepalu aser school tanurtemji pei  chirtem ama meima anepalu. Ibayongji ajaki tesayurtemji tsüngrem ama bilema akümtsübu aser meima liasü. Tanuübo item ronem ajak to samar school ki agi school ki memesük aser tesayur agi tesayur memesük tashitemetet aser shisatsü angudak tesem ajak tapayutsüka menendokba angur. Yashi tashi tashitemetetter adokdak mongjen tajung  asüba tesem agi tanü tazünger mali menendoktsüsa akümba dera aser kulitem ya jungjunga bushidanga government primary school-tem ya shia arudaktsütsü kanga nüngdak kümogo. Atangji, sorkar school majungba ya private school-tem dang atongtsü makok. Shitakba agibo private school lapokba agi sorkar school tajungba akümtsüla. Ajisuaka, Allahabad High court-i reprangtetba ama yimten yimsüsür aser tulurtem chirnurtem nungi tenzüka tesayurtem chirtem tashi private school nung züngdaktsür sorkar school-temjibo kibur maliba school amato kümdaktsüba agi tanü loktiliba nung tebilemtsü talila aika adoka lir. Item tebilemtsütem rongnung tanurtem aika school junga mezüngtet anenba tebilemtsü ya ka asütsü. Joko, asenoki  sorkar school-tembo tepetzük tia nung alir sensakertem aser kilirtem azüngtsü lapoktsüba school ama kümdaktsü nungji item ama school nung azüngtsübaji makamaiter kibong nungi adokba tanurtemia nümamedangtetter. Iba jagi parnok aika private school tajung nung azüngtsüa tebilemtsü aser sorkar school nunga mezüngner ta mazüng anenadokba lanurtem aika tesem balala nung kechi inyakar memetet kazüdokba angutsü. Inyakdi süra kakketreju ka tajung kümdaktsütsü kecha tasak mali. Ibaji atema School tesayur tajung ka dang nüngdaker. Iba school tesayur tajungsang nükjidong ajak agi pai sayuba tanurtemji tarutsü nung yimten, lokti aser arogo nung tagidak akaba senso kaka asütsüla. Iba tesayur atema tepelatiba mapangji pai sayuba tanurtemi  pai sayuba lesson angateta langzüdang aser takok anguba mapangji lir. Tanü sorkar school nung iba ama tesayur ka mengutetba tebilemtsü aser taiji yimten dak keta lir. Iba tebilemtsüji tesayur shimba yimya nungi tenzüker. Asen lima nungbo  Govt. Primary School nung inyaktsü tesayurtem shimtsü asoshi tatidang agitsü atema osangkakettem ajanga temsüa alir aser tejangrartem jaoka advertisement agütsüba mengudang aser majangshidang. Aji  oda, tesayurtem ajak pei kinunger aser pei party pur apia shimmer, anungji tanurtem dang sayutsu tejangraba aliba tesayur masu saka ita sen atema inyakba tesayurtem  teimba akümer. Tesayur mapa yabo tazüngba degree kija agi masü aser ita sen kija agia masü saka pa mesüra la dak sayutsu sempet aser tejangraba alitsüla. Item ajakji yimteni koma shimmer ta asüba nung tuluka keta lir. Aji oda, ajak dak alaka School Education nung inyakertembo minister nungi shir peon aser kiokertem tashi dak tarutsu asoshi bilema pei lima meima inyakba tangatetba shisatsu alitsula. Atangji, Allahabad High Court-i agütsüba  ozüngji mapa küma meinyaktettsüa akok, saka iba ozüngji asenok ajak asoshi tünudangtsü amai ka kümogo.