Sorkari ita ka tsüngda ILP ozüng benoktsüla; Tsümartemi tetsür-tanur dak dena azükba aitsür: WSH

Dimapur, September 22 (TYO): Lokti aliba tesem nung ozüng alema ganja achiba den külemi auto anishir tsümartemi tetsür-tanur densema kibong ka dak yimjak nung azükba tatalokbaji Western Sumi Hoho (WSH)-i sashia aitsür, ta WSH-i tanü sangdong ka ajanga metetdaktsü.
WSH-i item nisung tamajungurtemji tangsa pua ozüng kübok akokba tashi temerenshi tulutiba agutsütsü akhanger, iba den külemi WSH-i Chumukedima Youth Organisation (CYO) pusemba den külemi ozüng amer agency temi inyakba maparen ajak nung nungittsü, ta sangdong nungsa shia lir.
Western Sumi Hoho-i state sorkar aser Naga nungertem dang iba ya nenshia metetdaktsür, iba tatalokba ya tang mezüng ataloker masü saka taoba mapangtem nunga mejangjaba tesem nungi aruba tsümartemi asen Naga nunger senti taküm aika samatsüogo, ta ashi.
“Police records reprangdangra, Dimapur nung ozüng alema inyakba mapatem timba ka nung tsümartem densema aliba ya ajanga süngmanger. Melungtet teloktemia iba onük atema inyaktsü WSH-i tayongzükba agütsür,” ta sangdong nungsa shia lir.
“Ozüng alema arua alirtem onük nung küm aika Nagaland sorkari ola madokba atema WSH-i tasüngdangba akar. Alima tesem ajaklen, India linük nung aser Myanmar nung Rohingyas nunger tebilemtsü atema inyakba mapang ka nung Nagaland sorkaribo ola madokba den iba onük atema mapatong kecha lemteta meinyakba ya kangasa tia maka,” ta WSH-isa metetdaktsü.
“Western Sumi Hoho-i state sorkar dang, iba sangdong agütsüba anogo nungi tenzüka ita ka tsüngda Chumukedemi nungi New Field aser Dillai check gate tashi nung Inner Line Permit (ILP) benoktsü anogo atakzüktsür. Aji oda meinyakra, iba onük atema inyaktsü asoshi state sorkari melungtet teloktem aser Public nem tashi agütsüogo ta WSH-i züngshitsü. Iba nungji ajemdaker Jurisdiction nung ILP benoktsü atema WSH-i Western Sumi Youth Front (WSYF) nem tashi agütsütsü, aser iba mapa benoka inyakba mapang nungji mepetmesü kar danga adokra iba khuruetji Nagaland sorkari abentsü,”” ta Western Sumi Hoho (WSH)-isa metetdaktsüogo.